İkinci Biləciyə ilk dəfə təbii qaz verildi
Şəki rayonunun İkinci Biləcik kəndinə ilk dəfə təbii qaz verilib.
Bu barədə Ölkə.Az SOCAR-ın saytına istinadən məlumat verir.
“Azərbaycan Respublikası regionlarının 2014-2018-ci illərdə sosial-iqtisadi inkişafı Dövlət Proqramı”nın icrası istiqamətində “Azəriqaz” İstehsalat Birliyi tərəfindən ölkənin bütün ərazisi boyunca həyata keçirilən məqsədyönlü tədbirlər çərçivəsində indiyədək təbii qaz almayan yaşayış məntəqələri intensiv surətdə qazlaşdırlır, respublikanın qaz təchizatı şəbəkəsi genişləndirilir və müasirləşdirilir.
Şəki iqtisadi rayonunun “mavi yanacaqla” təchizatı da diqqət mərkəzindədir. Martın 26-da SOCAR-ın prezidenti Rövnəq Abdullayev Şəkinin İkinci Biləcik kəndinə ilk dəfə təbii qaz verilməşi münasibəti ilə keçirilmiş mərasimdə iştirak etmişdir.
Əvvəlcə tədbirə toplaşmış rayon icra hakimiyyətinin, bölgə ictimaiyyətinin nümayəndələri, “Azəriqaz” İB-nin təmsilçiləri, kənd ağsaqqalları və sakinlərlə söhbət edən şirkət rəhbəri onları Novruz bayramı və kəndin qazlaşdırılması münasibəti ilə təbrik etmişdir.
SOCAR prezidentinə bildirilmişdir ki, 300 abonenti olan kəndin qazlaşdırılması üçün birpilləli sistem əsasında ümumi uzunluğu 34 min 402 metr olan müxtəlif diametrli borularla daşıyıcı və məhəllədaxili qaz xətləri çəkilmişdir.
Boru xətlərinin 8280 metrini polietilen, 26 122 metrini isə metal borular təşkil etmişdir. Bundan əlavə abonentlərin hər biri üçün ayrıca sayğac və fərdi tənzimləyici quraşdırılmışdır.
Kəndə təbii qazın verilməsini bildirən rəmzi məşəli alovlandıran SOCAR-ın prezidenti Rövnəq Abdullayev yaxınlıqdakı evlərdən birinin mətbəxində də olmuş, ev sahiblərini təbrik etmiş, qazın təzyiqi ilə, əhalinin qazla davranış və təhlükəsizlik qaydaları üzrə maarifləndirilməsi işləri ilə maraqlanmışdır.
Daha sonra tədbirdə çıxış edən SOCAR rəhbəri respublikanın bütün regionlarında qaz təchizatı sisteminin inkişafı istiqamətində görülən işlərdən danışmış, Azərbaycan Respublikasının Prezidenti İlham Əliyev cənablarının ölkənin qazlaşdırılması proqramının icrasını daim diqqət mərkəzində saxladığını bildirmişdir.
Yaşayış məntəqələrinin sürətli templərlə qazlaşdırılmasının ölkədə həyata keçirilən davamlı sosial-iqtisadi inkişaf proseslərinin ayrılmaz tərkib hissəsi olduğunu qeyd edən Rövnəq Abdullayev əhalinin rifah halının durmadan yaxşılaşdırılması, insanların daha rahat yaşamaları üçün mühüm əhəmiyyət kəsb edən bu tədbirlərin ardıcıl şəkildə davam etdiriləcəyini söyləmişdir.
Tədbirdə çıxış edən sakinlər və ictimaiyyət nümayəndələri Şəki rayonunun İkinci Biləcik kəndinə ilk dəfə təbii qazın verilməsinə görə Azərbaycan Respublikasının Prezidenti cənab İlham Əliyevə minnətdarlıqlarını ifadə etmişlər.
