PKK yandaşları İsveçrədə əhalini qorxutdu
26 mart tarixində İsveçrənin Friburq şəhərində PKK yandaşları xüsusi törən keçiriblər. Formal olaraq Novruz bayramı münasibəti ilə küçə və meydanlara çıxan PKK simpatizanları qaba davranış sərgiləmələri ilə yerli əhalidə vahimə yaradıblar.
Bu barədə müsavat.com-a həmin şəhərdə təhsil alan türk tələbələr yazıblar. Onlar bəzi fotolar da yollayaraq, terror təşkilatı olan PKK simpatizanlarının terrorbaşı Abdullah Öcalanın rəsmi olan köynəklər geyindiklərini, çığırıb-bağırdıqlarını, bıçaqlı olduqlarını nümayiş etdirməkdən çəkinmədiklərini iddia ediblər. Qatarla müxtəlif şəhərlərdən Friburqa axşıan PKK-lılar vaqonlardakı sərnişinlərə vahiməli anlar yaşadıblar: "Çox idilər. Bağırıb-çağırırdılar. Hər kəs qorxurdu. Ötən həftə Sürixdə toplaşmışdılar, indi də istiqamət Friburq idi. Guya Novruz bayramı keçirirlər. Bu bəhanə ilə siyasi iddialarını ortaya qoyur, Türkiyə əleyhinə iş aparırlar... "
Bütün Avropaya yayılmış və son vaxtlara qədər Qoca Qitənin demokratiya paytaxtları tərəfindən himayə olunan PKK simpatizanları Şengen zonasında xüsusi imtiyazlara sahibdirlər. Avropa ölkələri terror təşkilatı olmasına baxmayaraq, PKK tərəfdarı olan kürdlərə məmnuniyyətlə sığınacaq verir, onlara sözün həqiqi mənasında qucaq açır.
İsveçrə də belə ölkələrdən ən barizidir. Lakin son vaxtlar Avropanı saran terror kabusu demokratiya paytaxtlarına rəhbərlik edənlərin anti-Türkiyə əhvalına qapılaraq, nə qədər səhvə yol verdiklərini göstərməkdədir.
Artıq PKK yandaşları Avropa üçün narahatlıq və qorxu , təhdid mənbəyinə çevrilməkdədir. Onlar mədəniyyətsiz davranışları¸ reaksioner əhvalları ilə Avropa toplumuna uyğun gəlmir, yerli əhalidə vahimə yaradırlar. Lakin hələ ki, hakimiyyət nümayəndələri Türkiyənin ərazi və dövlət müstəqilliyini tanımayan, ona xəyanət edən bu separatçıları himayə altında saxlamaqda davam edirlər.
