Akademik Milli Dram Teatrında Novruz şənliklərinə yekun vurulub
Akademik Milli Dram Teatrında “Keçəlin şahlığı” tamaşasının nümayişi və Novruz şənlikləri uğurla başa çatıb.
Rejissorlar Anar Sadıqov və Əlif Cahangirovun quruluş verdiyi səhnə əsəri M.F.Axundzadənin “Aldanmış kəvakib” əsərinin motivləri əsasında hazırlanıb. Tamaşada uşaqların və gənclərin estetik tərbiyəsi, psixoloji hazırlığı ilə bağlı bir sıra vacib məqamlara toxunulub.
Səhnə əsərində “Sehrli xalat” filmi də xatırlanıb. İo-Kio babanın sehrli xalatı vasitəsi ilə gələcəyə səfər edilib, Novruz bayramının keçmiş və gələcəklə bağlı olduğu xüsusi vurğulanıb.
“Keçəlin şahlığı” tamaşasının quruluşçu rəssamı İlham Elxanoğludur.
Səhnə əsərində əsas rolları əməkdar artist Mehriban Xanlarova, aktyorlar Cümşüd Zeynalov, Ramin Şıxəliyev, Hikmət Rəhimov, Rada Nəsibova, Elnar Qarayev, İlahə Həsənova, Rəşad Bəxtiyarov, Elnur Qədirov, Rüstəm Rüstəmov, Elçin Əfəndi, Sərdar Rüstəmov, Vüsal Mustafayev ifa edib.
Tamaşa martın 19-dan 28-dək gündə dörd seans olmaqla (saat 11:00, 13:00, 15:00, 17:00) tamaşaçıların ixtiyarında olub.
