AXCP sədrindən İntiqam Əliyevin azad edilməsi ilə bağlı
"Hüquq müdafiəçisi, bütün demokratik düşərgənin dostu, çox hörmətli, dəyərli və əsl ziyalımız İntiqam Əliyev bu gün azadlığa buraxılıb. Bundan sevincli, bundan gözəl xəbər nə ola bilərdi? Günahsız bir ziyalının həbsdən buraxılması qəlbimizi fərəhlə doldurub".
Ölkə.Az xəbər verir ki, bu sözləri Azərbaycan Xalq Cəbhəsi Partiyasının sədri Razi Nurullayev deyib. Partiya sədri bildirib ki, İntiqam Əliyev Azərbaycan üçün barmaqla sayılacaq yox, sayılmayacaq qədər xeyirli işlər görüb:
"O, daima haqsızlığa məruz qalmışların yanında yer tutub. Məhz onun hazırladığı və Avropa məhkəməsinə göndərdiyi işlərlə neçə-neçə insan ədalətə qovuşub. İntiqam Əliyevin buraxılması hakimiyyətin düzgün qərarıdır. Onun həbsdə qalması hakimiyyət üçün də başağrısı idi. Bütün dünyanı qarşısına almaq və öz vətəndaşlarını günahsız yerə cəzalandırmaq heç bir ölkəyə, o cümlədən Azərbaycan hakimiyyətinə başucalığı gətirə bilməzdi".
Razi Nurullayev İntiqam Əliyevin 5 il şərti cəza almasına da münasibət bildirib:
"Lakin, İntiqam Əliyev 5 il şərti cəza ilə də “müjdələndirilib”. Bu o deməkdir ki, o hələ də günahsız olaraq cəza çəkəcəkdir. İnanıram ki, bu cəza da yaxın zamanlarda onun üzərindən götürüləcək. Hakimiyyəti bütün siyasi məhbusları azad etməyə səsləyirəm. Ölkədə siyasi məhbus məsələsini qapatmaq həm Azərbaycanın, həm də vətəndaşlarımızın marağındadır. İqtidar marağı xalqın marağından öndə dura bilməz".
AXCP sədri sonda İntiqam Əliyevi azadlığa qovuşması münasibətilə təbrik edib.
