"Azərbaycanda saatla bağlı məsələlərə cavabdeh qurum var"

Azərbaycan yay vaxtına keçiddən imtina etsə də mobil telefon, proqram və əməliyyat sistemləri sahiblərindən "gizlin" artıq yay vaxtına keçiblər.

Problem hələ də həll olunmayıb. Bu cür halın yaşanmasında hansı qurum günahkardır?

Bununla bağlı "Multimedia" İnformasiya Sistemləri Texnologiyaları Mərkəzinin direktoru, Azərbaycan İnternet Forumunun prezidenti Osman Gündüz Ölkə.Az-a danışıb:

"Azərbaycanda saatla bağlı məsələlərə cavabdeh dövlət qurumu Standartlaşdırma, Metrologiya və Patent üzrə Dövlət Komitəsidir. Nazirlər Kabineti saatların irəli çəkilməyəcəyi ilə bağlı qərar qəbul edəndən sonra bu qurum müəyyən addımlar atmalı idi. Hökumətin qərarının icrası ilə bağlı həm real dünyada, həm də virtual dünyada saatın dəyişdirilməməsini həyata keçirməli idi. Saat lokal əhəmiyyətli məsələ deyil, bu həm də qlobal mahiyyət kəsb edən məsələdir.

Saatla bağlı dünyada bəlli bir standart var. Ona uyğun da Azərbaycanın özünün saat qurşağı var. Azərbaycan hansısa dəyişikliyə gedirsə, qlobal standartlara nəzərat edən şirkətləri bu haqda məlumatlandırmalıdır. Dünyanın saat qurşaqları ilə bağlı məlumat bazası var. Azərbaycan da özünün dəyişikliyini həmin o məlumat bazasına daxil etməli idi. Hazırda Azərbaycan tərəfindən bu addım atılmayıb. Hazırda orada köhnə məlumat qalıb.

Mobil telefonlarda, proqramlarda saat irəli çəkilib. Mobil telefon və proqram istehsalçıları Azərbaycan saatı ilə bağlı informasiyanı Azərbaycan Nazirlər Kabinetindən yox, qlobal informasiya bazasından alırlar".

Qeyd edək ki, yay-qış rejiminə keçid 1997-ci ildən tətbiq edilirdi.

Səxavət Məmməd
Ölkə.Az