Amerika tarixinə düşmüş 19 yaşlı azərbaycanlının doğum günüdür

Bu gün Azərbaycanın gənc vokalçısı, bir sıra beynəlxalq müsabiqələrin laureatı, xalq artisti Fidan Qasımovanın tələbəsi Emin Eminzadənin 19 yaşı tamam olur.

Doğum günündə Ölkə.az-a açıqlama verən vokalçı bildirib ki, 19 yaşını ailəsi və dostları ilə qeyd edəcək:

"Adətən təmtəraqlı doğum günlərini sevmirəm. Bu il də doğum günümü eyni qaydada qeyd edəcəyəm. Hazırda əsas fikrim təhsilimdədir. Çünki çatdığım pillədə dayanmaq fikrim yoxdur".

Qeyd edək ki, Emin Eminzadə Amerika Musiqili və Dramatik Akademiyasına (American Musical and Dramatic Academy - AMDA) daxil olmuş ilk azərbaycanlı kimi də hər iki ölkənin tarixinə düşüb. O indiyədək ABŞ Dövlət Departamentinin xətti və Azərbaycan Respublikası Təhsil Nazirliyinin dəstəyi ilə Texas ştatındakı “Marshall High School”da təhsil alıb və Amerikada təhsil aldığı bir il əzində Emin Eminzadə sənədlərini AMDA-ya verərək ən yüksək balla Akademiyaya qəbul olunub.

Xatırladaq ki, ABŞ-ın iki böyük şəhəri – Los-Anceles və Nyu-Yorkda mərkəzləşən AMDA-da məşhur müğənni Ceyson Derulo (Jason Derulo), aktyor Cesi Teylor Fergyuson (Jesse Tyler Ferguson), aktrisa Nina Aryaanda (Nina Arianda), Sem Andervud (Sam Underwood), Trey Bayers (Trai Byers), Rizvan Manci (Rizwan Manji), Li Tergesen (Lee Tergesen) və başqaları təhsil alıb.

İntiqam VALEHOĞLU
Ölkə.az