Fazil Mustafa: "Azərbaycanda təhsilin mahiyyəti doğru anlaşılmır"

9-cu və 11-ci siniflərin şagirdləri arasında oxumağı və yazmağı bacarmayanlar aşkar olunub. 11-ci sinif şagirdləri arasında 24 nəfər, 9-cu sinif şagirdləri arasında isə 76 nəfər adını yaza bilməyib. Azərbaycanda keçirilən buraxılış imtahanlarının nəticəsində acınacaqlı hal aşkarlanıb.

Bununla bağlı Tələbə Qəbulu üzrə Dövlət Komissiyası (TQDK) məlumat yayıb.

Təhsilimizin bu acınacaqlı vəziyyəti ilə bağlı Böyük Quruluş Partiyasının sədri, deputat Fazil Mustafa Ölkə.Az-a danışıb:

"Bu təkcə təhsil sistemi ilə bağlı məsələ deyil. Bütövlükdə cəmiyyətin mütaliəsi, müəyyən problemləri öyrənmək həvəsinin aşağı olması ilə bağlı məsələdir. Təbii ki, bu həm də valideyinlərin məktəblə əlaqəsinin zəif olmasından qaynaqlanan bir durumdur.

Uşağın adını yaza bilmədiyi bir səviyyəyə gəlməsi illərlə bu prosesə biganə, laqeyd yanaşmanın nəticəsində belə bir durum ortaya çıxır. Əslində bu problemi araşdırıb həll etmək lazımdır. Bütün hallarda təhsildə, tibbdə və başqa sahələrdə korrupsiyaya yol aça biləcək bütün səbəbləri aradan qaldırmaq lazımdır. Təhsil fəlsəfəsi dəyişməlidir, təhsilin mahiyyəti, məqsədi doğru anlaşılmalıdır. Artıq insanlar diplom, attestat naminə yox, savadlı insan kimi yetişmək üçün təhsillənməlidirlər. Çox təəssüflər ki, biz cəmiyyətdə hələ bunu müşahidə etmirik".

Səxavət Məmməd
Ölkə.Az