ABŞ yezidilərə havadan 20 min litr su atdı

ABŞ hərbi-hava qüvvələri (HHQ) İraqda “İraq və Şam İslam Dövləti” (İŞİD) yaraqlılarının mühasirəsində olan yezidi kürdlərə havadan humanitar yardım atıb.

ABŞ administrasiyasının nümayəndəsi jurnalistlərə bildirib ki, İraqda həyata keçirilən humanitar əməliyyatlar yezidi kürdlərə havadan ərzaq və içməli su atılmasından ibarət olub. Yardım bir neçə min adam üçün nəzərdə tutulub.

“Missiya “C-17” və iki “C-130” hərbi-nəqliyyat təyyarəsindən ibarət idi. Onlar birlikdə təxminən 8 min adam üçün yemək və içməli su atdılar” - deyə administrasiyanın nümayəndəsi bildirib.

ABŞ administrasiyasının rəsmisi deyib ki, təyyarələrdən 20 min litr içməli su və 8 min istifadəyə hazır yemək payı atılıb. Humanitar yardım konvoyunu ABŞ HHQ-nin iki “F-18 Hornet” qırıcısı müşayiət edib. Qırıcılar və nəqliyyat təyyarələri Birləşmiş Ştatların Fars körfəzindəki təyyarədaşıyan gəmisindən havaya qalxıblar.

Bundan əvvəl ABŞ prezidenti Barak Obama bildirmişdi ki, Birləşmiş Ştatlar İraqda dini azlıqları, hər şeydən əvvəl yezidi kürdləri dəstəkləmək üçün humanitar əməliyyata başlayıb. Obama yezidi kürdlərin “İslam dövləti” qruplaşmasının (köhnə adı - İŞİD) ekstremistləri tərəfindən soyqırıma məruz qalmaq təhlükəsi qarşısında qaldıqlarını deyib.

Həmçinin Obamanın sözlərinə görə, İraq xristianları və Ərbil şəhərindəki amerikalı işçilər də ölüm təhlükəsi qarşısındadır./virtualaz.org/

Ölkə.Az