Razi Nurullayev: \"Şəhidlərimizin, xalqın heysiyyatı ilə oynayanları…\"
"Hakimiyyətə olan münasibət Qarabağ həqiqətini dəyişmir"
"Xalqın və şəhidlərimizin heysiyyatı ilə oynayanları lənətləyək və dostluqdan silək! Bu gün vətən uğrunda canlarını verən şəhidlərimizdən siyasi məqsədlər üçün istifadə edənlər, xalqın heysiyyatı ilə oynayanlar, populist çıxışlar edib, populist statuslar yazanları vətən uğrunda erməni ilə müharibəyə aparsalar, fərari olarlar".
Bunu Azərbaycan Xalq Cəbhəsi Partiyasının sədri Razi Nurullayev deyib. Sədr qeyd edib ki, mümkün deyil ki, nə müxalifət, nə də iqtidar cəbhəsində kimsə əsgərləri siyasi məqsədlər üçün ölümə göndərsin:
"Nə prezident, nə hökumət üzvləri, nə də müxalifət bunu bir əsgərinə belə rəva görməz. Hətta, görə də bilməz. Bu məsuliyyətin və günahın ağırlığı o qədər böyükdür ki, ən qüdrətli kəsi belə bir anda qovurub yaxar. Son günlər, on iki nəfər əsgərimizin ölümündə Müdafiə Nazirliyini, hökuməti, prezidenti, ümumən isə bu iqtidarı ağır ittihamlarla günahlandıranlar var. Eyni adamlar, həm də 100-dən çox erməni əsgərinin ölümünə, tanklarının yandırılmasına, hərbi qurğularının sıradan çıxmasına sevinirlər. Eyni adamlar həm də torpaqlarımızın düşmən tapdağından azad olunmasını istəyirlər və tələb edirlər. Necə olur? Ölümsüz və itkisiz torpaqları necə azad etmək olar?
Biz bu hakimiyyətin apardığı siyasətlə barışmırıq. Bu hakimiyyətə qarşı müxalifətdəyik və qorxmadan deyirik ki, ölkədə ciddi ədalətsizlik və saxtakarlıqlar var. Rüşvət və korrupsiya hər yerə sirayət edib. işsizlik baş alıb gedir” deyən AXCP sədri vurğulayıb ki, amma, hakimiyyətə bu münasibətimiz Qarbağa həqiqətini dəyişdirməz:
“Heç bir zaman Qarabağ kartından siyasi məqsədlər üçün istifadəni özümüzə rəva görmərik. Bu xəyanətə bərabər, millətə həqarətə və müstəqilliyimizə təhdid olar. Bu davada iqtidar kim olur olsun, onun yanındayıq. Bu gün iqtidar YAP-dır, prezident İlham Əliyevdir. Qarabağın azad olunması üçün YAP-ın və dövlət başçısı İlham Əliyevin yanındayıq. Bu gün ölən şəhidlərimizdən siyasi məqsədlər üçün istifadə edənlər, xalqın heysiyyatı ilə oynayanlar, populist çıxışlar edib, populist statuslar yazanları erməni ilə müharibəyə aparsalar, fərari olarlar. Xalqın və şəhidlərimizin heysiyyatı ilə oynayanları lənətləyək və dostluqdan silək!".
Razi Nurullayev şəhidlərin adlarının əbədiləşdirilməsi üçün hökumət tərəfindən ciddi addımların atacağına inandığını bildirib.
“Hər bir ölən əsgər qəhrəmandır. Bizim canımızdan can, qanımızdan qandır. Hökumət inanıram ki, onların adının əbədiləşdirilməsi üçün ciddi addımlar atacaq, onların ailələrinə maddi və mənəvi dəstəyi əsirgəməyəcək. Hər bir ölən əsgərin ailəsi gərək elə qayğı ilə əhatə olunsun ki, onlar övladlarına şəhid kimi baxa bilsinlər. Bizim tariximzdə, keçmişimizdə olub ki, müharibə veteranları qayğı ilə əhatə olunmayıblar. Bundan sonra belə hallar baş verərsə, bir məmur üzərinə düşən vəzifəni yerinə yetirməzsə, o zaman səsimizi qaldıraq və şəhidimizə və onun ailəsinə xor baxanları silək, ataq və lənətləyək”.
