Tapqaraqoyunluda ən son durum
Goranboy rayonunun Tapqaraqoyunlu kəndində hazırda sakitlikdir.
Ölkə.Az xəbər verir ki, bu barədə Trend-ə Goranboy rayon İcra Hakimiyyətinin başçısı Nizaməddin Quliyev məlumat verib.
İcra başçısı bildirib ki, erməni hərbi birləşmələri dünən kəndi iriçaplı silahlardan və artilleriyalardan atəşə tutub: "Atışma axşam saat 8-dək davam edib. Tapqaraqoyunluya iki mərmi düşdü. Gecə həmin ərazidə olmuşam və kəndə baxış keçirmişəm. Xoşbəxtlikdən mərmilər evlərdən aralı düşdüyündən dağıntı və tələfat olmayıb. Hazırda sakitikdi".
N.Quliyev deyib ki, aprelin 2-dən 5-dək ermənilərin cəbhə boyu kəndləri atəşə tutması nəticəsində Tapqaraqoyunlu kəndində 50 ev ziyan çəkib. Həmin evlərdən dağılanlar da var, qismən ziyan çəkən də. Hazırda ərazidə həmin evlərin sayı və vəziyyəti dəqiqləşdirilir.
İcra başçısı bildirib ki, kənd sakinlərindən 5 mülki şəxs yaralanıb. Onlara da tibbi yardım göstəriləndən sonra ev şəraitində müalicəyə buraxılıblar: "Dünən Tapqaraqoyunlu kəndinə elektrik enerjisinin verilişi tam bərpa edilib. Hazırda kəndə təbii qaz verilişinin bərpası ilə bağlı işlər görülür".
