Həftənin icmalı
Hərbi attaşelər Müdafiə Nazirliyinə toplandı
04.04.2016
Aprelin 4-də Azərbaycanın müdafiə naziri general-polkovnik Zakir Həsənovun göstərişinə əsasən, ölkəmizdə akkreditə olunmuş xarici dövlətlərin hərbi attaşelərinin iştirakı ilə Beynəlxalq Hərbi Əməkdaşlıq İdarəsində toplantı keçirilib.
Bu barədə Ölkə.Az-a Azərbaycan MN-dən bildiriblər.
Məlumata görə, toplantıda Müdafiə Nazirliyinin Beynəlxalq Hərbi Əməkdaşlıq İdarəsinin rəisi general-mayor Hüseyn Mahmudov iştirak edib.
Görüşdə Ermənistan-Azərbaycan qoşunlarının təmas xəttində son zamanlar yaranan gərginliklə bağlı, o cümlədən atəşkəsin pozulması səbələri, düşmənin müdafiənin ön xəttinə etdiyi basqın cəhdləri, erməni silahlı qüvvələri tərəfindən iriçaplı silahlardan mütəmadi olaraq cəbhə xətti boyu yerləşən Azərbaycan kəndlərinin atəşə tutulması barədə hərbi attaşelərə obyektiv məlumatlar təqdim edilib.
Bakıdan yüzlərlə insan döyüşmək üçün cəbhə bölgəsinə gedir — Polis postlar qurub
04.04.2016
Azərbaycanın müxtəlif yerlərindən cəbhə bölgəsinə könüllü olaraq vuruşmaq üçün axın edənlərin qarşısını almaq üçün döyüş bölgəsinə yaxın ərazilərdə polis və hərbi blokada postları yaradıblar.
Ölkə.Az xəbər verir ki, bu barədə İnterfax-Azərbaycan yerli sakinlərə istinadən məlumat yayıb. Müdafiə nazirin mətbuat xidmətinin rəhbəri Vaqif Dərgahlı isə bildirib ki, hazırda Azərbaycan ordusu ona verilən tapşırıqların öhdəsindən gələ bilir.
O bildirib ki, cəbhəyanı zonalardan insanlar qruplar şəklində gəlirlər və ermənilərlə döyüşməyə hazır olduqlarını bildirirlər.
Hücuma keçən düşmənin 3 tankı və 30-a qədər hərbçisi məhv edildi
04.04.2016
Aprelin 4-də erməni silahlı bölmələri Xocavənd - Füzuli istiqamətində Azərbaycan Silahlı Qüvvələrinin mövqelərinə hücuma cəhd göstərib.
Müdafiə Nazirliyinin mətbuat xidmətindən Ölkə.Az-a bildirilib ki, cavab olaraq Azərbaycan Silahlı Qüvvələri düşmənin mövqelərinə sarsıdıcı zərbələr vurub. Əks-hücum zamanı erməni silahlı qüvvələrinin 3 tankı və 30-dək hərbi qulluqçusu məhv edilib. Bundan əlavə, qoşunlarımızın vurduğu dəqiq cavab atəşi ilə düşmənin bir batareyası darmadağın edilib.
Silahlı Qüvvələrimiz cəbhəboyu əməliyyat şəraitini tam nəzarət altında saxlayır və gözlənilən bütün təxribatların qarşısını almağa hazırdır.
Ermənilərin atdığı mərmi Tərtərdə dinc sakini yaraladı
04.04.2016
Erməni silahlı qüvvələrinin atdığı mərmilərdən biri Tərtər rayonun Düyərli kəndində həyətyanı sahəyə düşüb.
APA-nın Qarabağ bürosunun xəbərinə görə, hadisə bu gün günorta saatlarında qeydə alınıb. Kənd sakini, 1983-cü il təvəllüdlü Əliyeva Mehparə Nəbi qızı çoxsaylı qəlpə yaraları alıb.
Tərtər Mərkəzi Rayon Xəstəxanasına çatdırılan qadının vəziyyətinin orta-ağır olduğu bildirilir.
Silahlı Qüvvələrdə qana olan tələbat tam təmin edilir
04.04.2016
Silahlı Qüvvələrdə qan və qan komponentlərinə olan tələbat Baş Klinik Hospitalın Qan Bankı bölməsi tərəfindən tam təmin edilir.
Bu barədə məlumat verən hospitalın Qan Bankı bölməsinin rəisi, tibb xidməti polkovnik-leytenantı Kazım Quliyev bildirib ki, hazırda bütün qan və qan komponentləri Qan Bankı bölməsində var. Lazım olan vasitələrlə təmin etmək üçün bölmə hər zaman olduğu kimi 24 saat fasiləsiz fəaliyyət göstərir.
Azərbaycan dünyaya çağırış etdi
04.04.2016
Azərbaycanın xarici işlər naziri Elmar Məmmədyarov ATƏT-in Minsk Qrupunun üzv dövlətləri, eləcə də MDB ölkələri, ATƏT-in Fəaliyyətdə olan Sədri statusunda Almaniya və ATƏT sədrliyində olan troyka dövlətlərinə və BMT, İƏT və NATO-nun Baş katiblərinə və Avropa İttifaqının Xarici İşlər və Təhlükəsizlik Siyasəti üzrə Ali Nümayəndəsi Federika Mogeriniyə məktub ünvanlayıb.
XİN-dən Ölkə.Az-a verilən məlumata görə, məktubda 2 aprel 2016-cı il tarixində cəbhəyanı ərazilərdə sıx məskunlaşan mülki əhali hədəfə alınaraq, Ermənistan tərəfindən Azərbaycan Silahlı Qüvvələrinin qoşunların təmas xətti boyunca mövqeləri ağır silahlardan intensiv atəşə tutması və nəticədə bir neçə mülki şəxslər arasında tələfat olduğu haqqında məlumat verib.
Bildirilib ki, Azərbaycan Silahlı Qüvvələri özünün beynəlxalq səviyyədə tanınmış sərhədləri daxilində mülki əhalinin təhlükəsizliyinin təmin edilməsi, Ermənistanın təxribatlarının dayandırılması məqsədilə lazımı addımlar atıb.
Borçalıdakı soydaşlarımızdan Azərbaycana dəstək aksiyası
04.04.2016
Gürcüstan ali məktəblərində təhsil alan Azərbaycan və Gürcüstan vətəndaşları olan azərbaycanlı tələbələr Azərbaycanın Tiflisdəki səfirliyi qarşısında dəstək aksiyası keçiriblər.
Ölkə.Az xəbər verir ki, APA-nın Gürcüstan bürosunun məlumatına görə, 60-dan çox tələbə əllərində müxtəlif şüarlar Tiflisin küçələrindən keçiblər.
Onlar “Dağlıq Qarabağ Azərbaycan torpağıdır!”, “Gəl de, gələk! Öl de, ölək!”, “Şəhidlər ölməz, vətən bölünməz!” şüarları səsləndiriblər. Tələbələr əllərində Azərbaycan, Türkiyə və Gürcüstanın bayraqlarını tutaraq ermənilər tərəfindən işğal olunan torpaqların azad olunmasına həmişə hazır olduqlarını bildiriblər.
Azərbaycanlı tələbələr Gürcüstan ali məktəblərində təhsil alan gürcü gənclərinin də onların bu arzusunu dəstəklədiklərini, Gürcüstanın da 20 faiz torpaqlarının işğal olunduğunu bildiriblər.
Ermənistandan etiraf: itkilərinin bir hissəsini təsdiqlədilər
04.04.2016
Ermənistan hökuməti yenə itkilərin sayını ictimaiyyətdən gizlədib.
Ölkə.Az xəbər verir ki, qondarma Dağlıq Qarabağ Respublikasının Müdafiə Nazirliyinin yeni yaydığı məlumatda 20 əsgərin öldüyü, 72 nəfərin yaralandığı, 26 hərbçinin isə itkin düşdüyü bildirilir.
Həmçinin qeyd olunur ki, Ermənistan tərəfinin 7 tankı sıradan çıxıb.
Ermənistan Müdafiə Nazirliyi Azərbaycanın 8 yüksəkliyi (5-i cənub, 3-ü isə şimalda) ələ keçirdiyini də təsdiqləyib.
“Cavabımız çox sərt olacaq...” — Nazirlikdən açıqlama
04.04.2016
Erməni tərəfi bu dəqiqələrdə Dağlıq Qarabağda qoşunların təmas xəttində yaşayış məntəqələrini aktiv şəkildə atəşə tutur.
Ölkə.Az xəbər verir ki, bunu Trend-ə Azərbaycan Müdafiə Nazirliyinin mətbuat xidmətinin rəhbəri Vaqif Dərgahlı deyib.
O qeyd edib ki, Azərbaycan tərəfinin xəbərdarlığına baxmayaraq, Ermənistan silahlı qüvvələri yaşayış məntəqələrini atəşə tutmaqda davam edir: "Cavab zərbələri çox sərt olacaq".
Ermənilərin ən böyük hərbi bazası dağıdıldı — Düşmənin 70 əsgəri, 20 hərbi texnikası məhv edildi
05.04.2016
Aprelin 4-də axşam saatlarında və aprelin 5-nə keçən gecə ərzində bütün cəbhə boyu vəziyyət gərgin olaraq qalıb.
Müdafiə Nazirliyinin mətbuat xidmətindən verilən məlumata görə, cəbhə xəttinin Xocavənd-Füzuli və Ağdərə-Tərtər istiqamətlərində itirilmiş mövqelərinin geri alınmasının heç bir nəticə vermədiyini anlayan Ermənistan tərəfi qoşunların təmas xəttinə yaxın yaşayış məntəqələrini atəşə tutmaqda davam edir. Bu istiqamətdə düşmənin ən iri hərbi bazalarından biri sayılan, Ağdərə şəhərinə aparan əsas yol üzərində və onun şimalında yerləşən strateji baxımdan əhəmiyyətli Madagiz məntəqəsindəki hərbi bazanın qərargahı dəqiq zərbələrlə dağıdılıb.
Aprelin 4-də axşam saatlarında düşmənin müdafiə xəttində, mühəndis baxımdan hazırlanmış və dairəvi atəşətutma üçün səngərlərdə yerləşən 3 ədəd döyüş tankı heyətlə birlikdə atəş gücü vasitəsilə məhv edilib.
MN: Azərbaycan Ordusu 16 şəhid verdi
05.04.2016
Aprelin 4-də axşam saatlarında və aprelin 5-nə keçən gecə ərzində bütün cəbhə boyu vəziyyət gərgin olaraq qalıb.
Müdafiə Nazirliyinin mətbuat xidmətindən verilən məlumata görə, cəbhə xəttinin Xocavənd-Füzuli və Ağdərə-Tərtər istiqamətlərində itirilmiş mövqelərinin geri alınmasının heç bir nəticə vermədiyini anlayan Ermənistan tərəfi qoşunların təmas xəttinə yaxın yaşayış məntəqələrini atəşə tutmaqda davam edir. Bu istiqamətdə düşmənin ən iri hərbi bazalarından biri sayılan, Ağdərə şəhərinə aparan əsas yol üzərində və onun şimalında yerləşən strateji baxımdan əhəmiyyətli Madagiz məntəqəsindəki hərbi bazanın qərargahı dəqiq zərbələrlə dağıdılıb.
Aprelin 4-də axşam saatlarında düşmənin müdafiə xəttində, mühəndis baxımdan hazırlanmış və dairəvi atəşətutma üçün səngərlərdə yerləşən 3 ədəd döyüş tankı heyətlə birlikdə atəş gücü vasitəsilə məhv edilib.
Bütün cəbhə boyu son iki gün ərzində düşmənlə döyüşlərdə igidlik və rəşadətlə vuruşan Silahlı Qüvvələrimizin hərbi qulluqçularından 16 nəfəri şəhid olub.
Azərbaycan ermənipərəst telekanalın əməkdaşlarını ölkədən qovdu
05.04.2016
Rusiyanın LifeNews telekanalının çəkiliş qrupu Azərbaycandan deportasiya olunub. Bu telekanalın rəhbəri erməni Aşot Qabrielyandır.
Ölkə.Az bildirir ki, Azərbaycanın Xarici İşlər Nazirliyinin mətbuat xidmətinin rəhbəri Hikmət Hacıyevin dediyinə görə, telekanalın jurnalistləri Azərbaycanda heç bir rəsmi akkreditasiya olmadan çalışıblar və Dağlıq Qarabağ münaqişəsi ilə bağlı təxribat xarakterli, yalan məlumatlar yayıblar.
"Onlar Azərbaycana qarşı təxribatla məşğuldular, Dağlıq Qarabağ münaqişəsi barədə yanlış məlumatlar yayırdılar. Bunu nəzərə alaraq həmin jurnalistlərin ölkəmizin ərazisində olması qeyri-qənaətbəxş sayılıb", - H.Hacıyev deyib.
Ermənilər Əsgəran və Xankəndidən qaçır — POLİSLƏ QARŞIDURMA
05.04.2016
Polislə mülki vətəndaşlar arasında qarşıdurma olub
Ölkə.Az xəbər verir ki, Əsgəran rayonunda məskunlaşmış ermənilərlə qondarma rejimin polis qüvvələri arasında ciddi toqquşma baş verib, mülki şəxslər arasında xeyli sayda yaralananlar var.
Bu haqda məlumatı işğal olunmuş Azərbaycan ərazisində yaşayan ermənilər sosial şəbəkələrdə yazıb. Sosial şəbədəki ermənilər yazır ki, Əsgəranda yaşayan ermənilər rayondan çıxıb, meşə yollarla Xankəndinə qaçmaq istəyiblər. Polislər isə əhalinin rayondan çıxmasının qarşısını almağa çalışıb. Bundan sonra polislərlə sakinlər arasında şiddətli toqquşma baş verib.
Həmçinin sosial şəbəkədə ermənilər yazır ki, hazırda Xankəndinin giriş-çıxışında ermənilərin rayondan qaçmasının qarşısını almaq üçün postlar qurulub.
Ermənilər 16 yaşlı qızı öldürdülər
05.04.2016
Erməni silahlı qüvvələrinin yaşayış məntəqələrini artilleriya zərbələri ilə vurması nəticəsində daha bir dinc sakin həlak olub.
Ölkə.Az APA-ya istinadən xəbər verir ki, hadisə bu gün səhər saatlarında Tərtər rayonunun Həsənqaya kəndində qeydə alınıb.
Mərminin evə düşməsi nəticəsində 2000-ci təvəllüdlü Həsənova Turanə Kamandar qızı ölüb.
Məlumata görə, Kəlbəcər rayonundan məcburi köçkün olan Həsənovlar ailəsi Həsənqaya kəndində məskunlaşıb.
16 yaşlı qızın meyiti müayinə olunmaq üçün Tərtər morquna aparılıb.
MN: Azərbaycan hələlik “Smerç”dən istifadə etməyib
05.04.2016
Azərbaycan Müdafiə Nazirliyi Dağlıq Qarabağ istiqamətində “Smerç” reaktiv yaylım atəş sistemindən istifadə edilməsi ilə bağlı erməni tərəfinin yaydığı məlumatlara münasibət bildirib.
Nazirliyin mətbuat xidmətinin rəhbəri Vaqif Dərgahlı açıqlamasında bildirib ki, Azərbaycan Silahlı Qüvvələrinin sərəncamında “Smerç” sistemi var, lakin hələlik ondan istifadə edilməyib.
Qeyd edək ki, Ermənistan mətbuatı Azərbaycan Ordusunun onlara qarşı “Smerç” silahından istifadə etməsi barədə məlumat yayıb.
Ermənistan tərəfindən törədilən təxribatlar xarici mətbuatda
05.04.2016
Azərbaycan Respublikasının Batumi şəhərindəki Baş Konsulluğu tərəfindən Acaristan Muxtar Respublikasının nüfuzlu “Adjara P.S.”qəzetində Azərbaycan Prezidenti İlham Əliyevin Təhlükəsizlik Şurasının iclasında Ermənistanın Azərbaycana qarşı növbəti silahlı təxribatları ilə bağlı çıxışı gürcü dilində tərcümə olunaraq ictimaiyyətin diqqətinə çatdırılıb.
Həmçinin, Azərbaycan Respublikası Xarici İşlər Nazirliyinin cəbhədə yaranmış son gərginliklə əlaqədar bəyanatı “Adjara P.S.” qəzetində yayımlanıb. Azərbaycan Respublikasının Batumi şəhərindəki Baş Konsulu Rəşad İsmayılov “Adjara P.S.”qəzetinə geniş müsahibə verib. Musahibədə, BMT-nin işğal olunmuş Azərbaycan torpaqları ilə bağlı qətnamələrinə məhəl qoymayan Ermənistan ordusunun cəbhə xəttində Azərbaycanın mülki əhalisinə qarşı həyata keçirdiyi təxribatlar pislənilib, erməni silahlı birləşmələrinin atəşkəs prinsiplərinə əməl etməməsi qınanılıb. Habelə, dünya ictimaiyyəti və beynəlxalq qurumlar baş verən hadisələrə biganə qalmamağa, Ermənistan dövlətinin apardığı təcavüzkarlıq siyasətinə son qoymaq üçün tədbirlər görməyə çağırılıb.
Ermənistan ordusu atəşi dayandırdıqlarını elan etdi
05.04.2016
Üzdəniraq "dağlıq qarabağ" rəhbərliyi Azərbaycan ordusunun zərbələrinə tab gətirməyərək birtərəfli atəşkəs elan edib.
Ölkə.az Ria Novostiyə istinadən xəbər verir ki, bu haqda qondarma respublikanın müdafiə nazirliyinin mətbuat xidmətinin rəhbəri Senor Asatryan məlumat verib.
Rəsmi Bakı hələlik bu məsələni şərh etməyib.
Müdafiə Nazirliyi: Yardım kampaniyalarına heç bir ehtiyac yoxdur
05.04.2016
Nazirlik məlumat yaydı.
Müdafiə Nazirliyi son günlər sosial şəbəkələrdə ayrı-ayrı şəxslərin Silahlı Qüvvələrə yardım adı altında əhaliyə çağırışlar edərək onlardan pul və ərzaq istəməsinə, vətəndaşları bu tip kampaniyalara qoşulmağa dəvət etmələrinə münasibət bildirib.
Ölkə.Az-ın Müdafiə Nazirliyinin mətbuat xidmətinə istinadən verdiyi xəbərə görə, Silahlı Qüvvələrin bu tipli dəstək və yardım kampaniyalarına heç bir ehtiyacı yoxdur.
“Bununla əlaqədar bildiririk ki, Silahlı Qüvvələrimiz dövlətimizin, şəxsən Azərbaycan prezidenti, Ali Baş Komandan İlham Əliyevin hərtərəfli diqqət və qayğısı ilə əhatə olunub. Ordunun maddi-texniki bazasının möhkəmləndirilməsi, həmçinin, ərzaq və digər təminatının daha da yaxşılaşdırılması üçün böyük işlər görülüb, bu istiqamətdə tədbirlər davam etdirilməkdədir. Ona görə də Silahlı Qüvvələrin bu tipli dəstək və yardım kampaniyalarına heç bir ehtiyacı yoxdur”, - məlumatda bildirilir.
Azərbaycan Qarabağda döyüşlərdə 31 şəhid verib
05.04.2016
Azərbaycan Silahlı Qüvvələrinin Qarabağda döyüşlər zamanı 31 hərbi qulluqçusu şəhid olub.
Ölkə.Az xəbər verir ki, bu barədə RİA Novosti-yə Müdafiə Nazirliyinin mətbuat xidmətinin rəhbəri Vaqif Dərgahlı deyib.
“Hərbi əməliyyatlar zamanı Azərbaycannın 31 hərbi qulluqçusu şəhid olub. Müdafiə Nazirliyi döyüşlərdə həlak olanların ailələrinə başsağlığı verir”, - o deyib.
Dünya KİV-lərinin nümayəndələri cəbhə bölgəsində olublar
06.04.2016
Dünyanın 30 aparıcı KİV-nin jurnalistləri cəbhə xəttində olublar.
Ölkə.Az xəbər verir ki, Azərbaycan tərəfdən qoşunların təmas xəttinə gəlmiş jurnalistlərə bölgədəki son durum haqda məlumat verilib.
Dünya KİV-lərinin nümayəndələri Füzuli-Xocavənd, Ağdam və Tərtər-Ağdərə istiqamətində vəziyyətlə tanış olublar.
Qrupun tərkibində Qətərin "Əl-Cəzirə", İranın İRİPTV kanalı, Çinin CCTV kanalı, "Reuters" agentliyi, "France-Presse", "Associated-Press" agentliyi, Rusiyanın ORT kanalı və "Komsomolskaya pravda" qəzetinin jurnalistləri olublar.
Sadıkovun erməni generalla görüşü — Atəşkəs Moskvada razılaşdırılıb
06.04.2016
Azərbaycan-Ermənistan təmas xəttində ötən gün elan edilən atəşkəs Moskvada tərəflər arasında keçirilən görüşdə razılaşdırılıb.
Ölkə.Az xəbər verir ki, bu barədə Ermənistanın müdafiə naziri Seyran Ohanyan bildirib.
Erməni nazirin sözlərinə görə, razılıq ötən gün Azərbaycan Silahlı Qüvvələrinin Baş Qərargah rəisi, general-polkovnik Nəcməddin Sadıkov və erməni həmkarı general-polkovnik Yuri Xaçaturov arasında Moskvada keçirilən görüşdə əldə olunub.
WT: Ermənistan Azərbaycanı təcavüzkar kimi tanıtdırmaq istəyir
06.04.2016
ABŞ-da nəşr edilən “The Washington Times” qəzetində Azərbaycan və Ermənistan silahlı qüvvələrinin təmas xəttində münaqişənin gərginləşməsi haqqında məqalə dərc edilib.
Ölkə.Az Report-a istinadən xəbər verir ki, məqalədə regiondakı son şiddət qığılcımının son iyirmi il ərzində ən ciddi qarşıdurma olduğu qeyd edilib.
Məqalənin müəllifi olan siyasi şərhçi Castin Emler Azərbaycanın işğal edilmiş torpaqlarındakı son hadisələri Ermənistanın Azərbaycan Prezidenti İlham Əliyevin ABŞ prezidenti Barak Obamanın dəvəti ilə Vaşinqtona - Nüvə Təhlükəsizliyi Sammitinə səfərinə reaksiyası kimi dəyərləndirib. Müəllif yazıb ki, Azərbaycan Prezidentinin ABŞ-a dəvət edilməsi rəsmi Vaşinqtonun Azərbaycanın qlobal nüvə təhlükəsizliyi və terrorla mübarizədə artan strateji rolunu tanımasını göstərir.
Müdafiə naziri: Azərbaycan heç vaxt işğal faktı ilə barışmayacaq
06.04.2016
Müdafiə naziri general-polkovnik Zakir Həsənov aprelin 6-da Azərbaycanda səfərdə olan ATƏT-in Minsk qrupunun həmsədrləri İqor Popov (Rusiya Federasiyası), Ceyms Uorlik (ABŞ), Pyer Andryö(Fransa Respublikası) və ATƏT-in fəaliyyətdə olan sədrinin şəxsi nümayəndəsi Anjey Kasprşik ilə görüşüb.
Bu barədə Ölkə.Az-a Müdafiə Nazirliyinin mətbuat xidmətindən məlumat verilib.
Ermənistan-Azərbaycan qoşunlarının təmas xəttində baş verən son hadisələrlə bağlı vəziyyətin müzakirə edildiyi görüşdə general-polkovnik Z.Həsənov düşmən tərəfindən ölkəmizin yaşayış məntəqələrinin və mülki əhalinin atəşə məruz qalması faktlarını qarşı tərəfin diqqətinə çatdırıb.
Ölkə.az-ın ingilis dilli versiyası fəaliyyətə başladı
06.04.2016
Ölkə.az analitik informasiya portalının yeni ingilis dilli versiyası fəaliyyətə başlayıb.
Fəaliyyət göstərdiyi 2 ilə yaxın bir müddətdə Ölkə.az hər gün onminlərlə oxucunun xəbər qaynağına, mötəbər, dəqiq, qərəzsiz, tərəfsiz və etibarlı informasiya mənbəyinə çevrilib.
Qlobal internet media məkanında son vaxtlar ölkəmizin mədəniyyətinin, ədəbiyyatının, dövlətimizin siyasətinin təbliğatını daha da genişləndirmək məqsədi ilə portal rəhbərliyi ingilisdilli versiyanı işə salmaq qərarına gəlib.
Yeni versiyamıza en.olke.az linkindən daxil ola bilərsiniz.
Dövlətimiz və millətimiz üçün xeyirli-uğurlu olsun!
Müdafiə Nazirliyindən geri alınan yüksəkliklə bağlı — AÇIQLAMA
06.04.2016
Erməni mətbuatında Azərbaycan Silahlı Qüvvələrinin nəzarəti altına keçmiş Talış kəndi ətrafındakı yüksəkliklərin guya düşmən tərəfindən yenidən zəbt edilməsi barədə yayılan xəbərlərin heç bir əsası yoxdur və yalandır.
Ölkə.Az Müdafiə Nazirliyinə istinadən xəbər verir ki, bu cür məlumatların yayılması təlaş içində yaşayan erməni xalqını və mənəvi düşgünlüyə məruz qalmış, döyüş qabiliyyətini itirmiş düşmən ordusunun döyüşmək istəməyən əsgərlərini cüzi də olsa ruhlandırmaq məqsədilə Ermənistan hərbi-siyasi rəhbərliyi tərəfindən həyata keçirilən uğursuz və saxta fəaliyyətin nəticəsidir.
Müdafiə Nazirliyi bir daha bildirir ki, Ermənistan tərəfi gün ərzində cəbhənin müxtəlif istiqamətlərində atəşkəs rejimini pozmaqda davam edib və bu təxribatların qarşısını almaq məcburiyyətində qalan Silahlı Qüvvələrimizin cavab tədbirləri daha sərt olacaqdır.
Cəbhədən son xəbər — Düşmən minaatanlardan atəş açır
07.04.2016
Erməni silahlı bölmələri cəbhənin müxtəlif istiqamətlərində 60, 82 və 120 millimetrlik minaatanlardan, həmçinin iriçaplı pulemyotlardan da istifadə etməklə sutka ərzində atəşkəs rejimini ümumilikdə 119 dəfə pozub.
Ölkə.Az Müdafiə Nazirliyinin saytına istinadən xəbər verir ki, Ermənistan Respublikası İcevan rayonunun Berkaber, Paravakar kəndlərində yerləşən mövqelərdən Qazax rayonunun Qızılhacılı, Ağstafa rayonunun Köhnəqışlaq kəndlərində, Berd rayonunun Mosesqex, Çinari kəndlərində yerləşən mövqelərdən Tovuz rayonunun Ağdam, Əlibəyli, Koxanəbi kəndlərində, Krasnoselsk rayonu ərazisindəki adsız yüksəkliklərdə yerləşən mövqelərdən Gədəbəy rayonu ərazisindəki adsız yüksəkliklərdə yerləşən mövqelərimiz atəşə tutulub.
400 PKK terrorçusu Dağlıq Qarabağa göndərildi
07.04.2016
Terrorçu PKK qruplaşması Ermənistana dəstək məqsədilə 400 silahlı göndərib
"Report"un Türkiyə KİV-inə istinadən verdiyi məlumata görə, həmin terrorçular PKK-nın Kandil dağı (İraq ərazisi) və Kamışlıdakı (Suriya) düşərgələrindən çıxaraq, Ağrı dağı ərazisindən Ermənistana keçiblər.
Ermənistanda silahlılara terrorçu PKK-ya aid "Ağrı Qartalları" adlı qrupun erməni əsilli üzvləri Livan Karadağ, Hemaran Kervaçyan və Servet Bagopşin bələdçilik edib. Onlar üçün Ermənistanın Göyçə gölü (Sevan) sahillərində Vardenis (Göyçə) rayonunda düşərgə salınıb. Terrorçu PKK silahlıları Azərbaycanın işğal altında olan Dağlıq Qarabağ bölgəsinə göndərilib. Onlar Azərbaycanın işğal altında olan Ağdam, Cəbrayıl, Zəngilan və Füzuli rayonlarına yerləşdiriliblər.
"Azərbaycan ordusu ilə hesablaşmamaq olmaz" — Rusiyalı jurnalist
07.04.2016
“Rusiya Federasiyası həm Azərbaycan xalqı ilə, həm də erməni xalqı ilə sıx bağlıdır və biz qan tökülməsini istəməzdik. Hərçənd, cəmiyyətimiz parçalanıb – hər birimizin azərbaycanlılar arasında da dostumuz var, ermənilər arasında da. Mənim dostlarım arasında azərbaycanlılar da var, ermənilər də. İstəyirəm ki, bütün siyasi məsələlər sülh yolu ilə həll edilsin”.
Rusiyalı məşhur jurnalist, Rusiya Federasiyası Prezidenti yanında Vətəndaş cəmiyyətinin inkişafı və insan hüquqları şurasının üzvü Maksim Şevçenko bu sözləri AZƏRTAC-a müsahibəsində deyib.
O xatırladıb ki, belə məsələlərin dinc yolla həllinin təməli Minsk deklarasiyası ilə qoyulub. Bu deklarasiyanın əsas bəndləri belədir: erməni qoşunlarının Dağlıq Qarabağ hüdudlarından çıxarılması, qaçqınların qaytarılması və Dağlıq Qarabağın statusu haqqında referendumun keçirilməsi. Mənim fikrimcə, bu, çox ağlabatan platformadır. Bütövlükdə həmin platformanı Bakı da qəbul etmişdi, Yerevan da, lakin sonradan erməni tərəfin təqsiri üzündən bu məsələ pozuldu. Son hadisələrdən sonra mənə belə gəlir ki, Minsk platformasının sadəcə alternativi yoxdur”.
Əkrəm Əylisliyə Bakıdan çıxmaq qadağan edildi
07.04.2016
Barəsində cinayət işi açılan yazıçı Əkrəm Əylisli haqqında başqa yerə getməmək barədə qət-imkan tədbiri seçilib.
Ölkə.Az xəbər verir ki, bu barədə Lent.az-a Əkrəm Əylislinin vəkili Elçin Sadıqov məlumat verib.
Vəkil bildirib ki, Əkrəm Əylisli istintaq dövründə Bakı şəhərindən kənara çıxa bilməz.
Qeyd edək ki, Əkrəm Əylisli barəsində cinayət işinin istintaqını Hava Nəqliyyatında Polis İdarəsinin istintaq bölməsi aparır.
Yazıçı barəsində Cinayət Məcəlləsinin 221.1-ci (xuliqanlıq) maddəsi ilə ittiham elan edilib. İttihama görə, Əkrəm Əylisli 30 mart 2016-cı il tarixdə ictimai qaydanı pozub, söyüşlər söyüb, Dövlət Sərhəd Xidmətinin əməkdaşı, 1981-ci il təvəllüdlü Nihal Seyidovun döş qəfəsinin sağ yarı hissəsinin yuxarı üçdə birinə zərbə vurub.
Əkrəm Əylisi aprelin 6-da istintaqa verdiyi ifadəsində ittihamları qəbul etməyib.
Döyüşlər vaxtı bir məktəbli həlak olub, digəri yaralanıb
07.04.2016
Cəbhə bölgəsində baş verən hərbi əməliyyatlar nəticəsində 1 məktəbli yaralanıb, 1 məktəbli isə həlak olub.
Ölkə.Az APA-ya istinadən xəbər verir ki, təhsil nazirinin müavini Ceyhun Bayramov jurnalistlərə deyib ki, Ağdamın Sarıcalı kənd tam orta məktəbinə mərmi düşüb.
Bu hadisə dərs saatı ərzində baş vermədiyindən xəsarət alan olmayıb:
“Lakin cəbhə bölgəsinə yaxın ərazidə həyətyanı sahəyə düşən mərmi nəticəsində 13 yaşlı bir şagird yaralanıb. O, xəstəxanaya yerləşdirilib, hazırda vəziyyəti yaxşıdır”.
Azərbaycanda talassemiya xəstələrinin sayı açıqlandı
07.04.2016
"Nikaha daxil olmaq istəyən şəxslərin tibbi müayinədən keçmə Qaydası"na uyğun olaraq ötən il iyunun 1-dən bu günə qədər nikaha daxil olmaq istəyən 117 500 insan tibbi müayinədən keçib".
Ölkə.Az bildirir ki, bunu Report-a açıqlamasında B.Eyvazov adına Elmi-Tədqiqat Hematologiya və Transfuziologiya İnstitutunun talassemiya-profilaktika şöbəsinin müdiri Aysel Mikayılzadə deyib.
Onun sözlərinə görə, həmin şəxslərin 6 521 nəfərinin talassemiya daşıyıcısı olduğu üzə çıxıb: "Bu haqda onların özlərinə də məlumat verilib. Müayinə aparıldığı gündən indiyə qədər 50 cütlükdə, yəni həm oğlanda, həm də qızda talassemiya aşkarlanıb. Hətta xəstəlik aşkarlanandan sonra evlənməkdən imtina edənlər də olub. Müayinələrin nəticələri həmin şəxslərin qeydiyyatda olduqları tibb müəssisələrinə göndərilir".
Mehriban Əliyeva ağladı — Şəhid anaları ilə görüşdə
07.04.2016
Bu gün Heydər Məscidində Azərbaycan və Ermənistan qoşunlarının təmas xəttində ermənilərin təxribatının qarşısını alarkən qəhrəmanlıqla şəhid olan hərbçilərin ruhuna Heydər Əliyev Fondunun prezidenti Mehriban Əliyevanın adından ehsan verilib.
Ölkə.Az xəbər verir ki, ehsan mərasimində Heydə Əliyev Fondunu prezidenti Mehriban Əliyeva, Vətən uğrunda şəhid olan və yaralanan hərbçilərin anaları, ictimaiyyətin nümayəndələri iştirak ediblər.
Azərbaycanın 1-ci xanımı, Heydər Əliyev Fondunu prezidenti Mehriban Əliyeva Heydər Məscidinə gələrək, son günlər qoşunların təmas xəttində düşmən tərəfindən atəşkəsin pozulması nəticəsində Vətən uğrunda qəhramanlıqla şəhid olan və yaralanan hərbçilərin ailə üzvləri və yaxınları ilə görüşüb. Mehriban Əliyeva təmas xəttində Ermənistan hərbi qüvvələrinin Azərbaycana qarşı törətdikləri son təxribatlar nəticəsində həlak olan Azərbaycan oğullarına Allahdan rəhmət, yaralananlara isə şəfa diləyib.
“Bir ana kimi qarşınızda baş əyirəm...” — Birinci xanım
07.04.2016
Xəbər verdiyimiz kimi, bu gün Heydər Məscidində Azərbaycan və Ermənistan qoşunlarının təmas xəttində ermənilərin təxribatının qarşısını alarkən qəhrəmanlıqla şəhid olan hərbçilərin ruhuna Heydər Əliyev Fondunun prezidenti Mehriban Əliyevanın adından ehsan verilib.
Ölkə.Az AzərTac-a istinadən birinci xanımın çıxışını təqdim edir:
"Əziz analar, mən bir ana kimi sizin qarşınızda baş əyirəm. Siz elə övladlar böyütmüsünüz ki, bu gün bütün xalq onlarla fəxr edir. Əlbəttə, heç bir ana istəməz ki, müharibə olsun, övladlarımız gənc yaşında dünyalarını dəyişsin. Azərbaycan dövləti Ermənistan-Azərbaycan, Dağlıq Qarabağ münaqişəsinin sülh yolu ilə həlli üçün artıq 20 ildən çoxdur ki, bütün səylərini göstərir. Biz istəyirik ki, torpaqlarımız azad edilsin. Biz istəyirik ki, insanlarımız öz doğma yurdlarına qayıtsın. Biz işğalçı deyilik. Biz işğalçı ilə mübarizə aparan millətik. Bizim heç bir başqa millətin, başqa xalqın torpağında gözümüz yoxdur. Biz, sadəcə, öz torpaqlarımızı işğaldan azad etmək istəyirik. Bu həqiqəti bütün dünya bilir və artıq qəbul etməlidir. Ədalətsiz, işğalçı siyasətin qarşısını almaq üçün bizim qəhrəman ordumuz, qəhrəman övladlarımız var. Azərbaycan xalqı üçün hər bir əsgərimiz dəyərlidir və əzizdir. Dünyanın ən böyük sərvəti olan ömrünü Vətən naminə qurban verən hər bir övladımız Azərbaycanın tarixində qəhrəman kimi yaşayacaq. Bu günlər bütün xalqımız ordumuza dəstək verir.
DTX-nın saytı işə başladı
08.04.2016
Dövlət Təhlükəsizlik Xidmətinin yeni saytı işə başlayıb.
Ölkə.Az-ın verdiyi xəbərə görə, bu gündən istifadəyə verilən sayt dtx.gov.az domenində yerləşir.
Saytda qurum haqda məlumatlar, qanunvericilik bazası, beynəlxalq əməkdaşlıq, kitabxana, Heydər Əliyev adına Akademiya və DTX-ya aid xəbərlərin yayımlandığı bölmələr yaradılıb.
Qurumun ictimaiyyətlə əlaqələr və “Qaynar xətt” nömrələri də açıqlanıb. DTX-nın balansında olan digər qurumlar haqda məlumat yerləşdirilib. Hazırda sayt Azərbaycan dilində fəaliyyət göstərir.
