Döyüşlər zamanı Azərbaycan mediası necə işlədi?

Son günlər hər kəsin diqqəti cəbhədə gedən döyüşlərdə oldu.

Cəbhədə gedən döyüşlər zamanı bəzi mətbu orqanlarımız bölgəyə öz reportyorlarını göndərdi, birbaşa oradan xəbərlər yazdı. Bəzi mətbu orqanlar isə Bakıdan cəbhə bölgəsi barədə xəbərlər yazmağa başladılar.

Baş verən döyüş əməliyyatları zamanı Azərbaycan mediası necə işlədi?

Mediamızın döyüşlər ərəfəsindəki fəaliyyəti haqda tanınmış jurnalist, Azərbaycan Milli Elmlər Akademiyası Nəsimi adına Dilçilik İnstitutunun Monitorinq şöbəsinin müdiri, tele-tənqidçi, professor Qulu Məhərrəmli Ölkə.Az-a verdiyi açıqlamasında danışıb:

"Hər şeyi müqayisə ilə demək uyğun olar. Hesab edirəm ki, 2 il əvvəl avqust ayında döyüşlər şiddətlənəndə, o situasiyadan fərqli olaraq demirəm ki, media çox peşakar işlədi, ancaq 2 il əvvəlkinə nisbətən lazımsız informasiyalar o qədər də çox yayılmadı. Bu proseslərdə yalnız və yalnız Müdafiə Nazirliyinin informasiya xidmətinin işində müəyyən irəliləyişlərin olduğu göründü. Bununla yanaşı məhz hadisə yerinə, jurnalistlərin döyüş zonasına gedişinin təmin olunması, oradan informasiyaların verilməsi ilə bağlı müəyyən problemlərin yenə də olduğu göründü. Jurnalist üçün, auditoriya üçün önəmli olan informasiyanın birbaşa mənbədən götürülməsidir. O mənbələrlə işləmək mənasında əlbəttə bizim jurnalistlər problem yaşadılar.

Müdafiə Nazirliyi səyyar mətbuat xidməti qurmalı idi. Bütün millət, dövlət bu yönə səfərbər olunur. Səyyar, jurnalistlərlə çevik əlaqə saxlayan, onları məlumatlandıran, görüntü ilə təmin edən bürolar yaradılmalı idi. Bu bürolar müvəqqəti yaradılır və jurnalistlər dəqiq məlumatlarla təmin olunur. Bunlar olmayanda, cəbhə xəttinə gedən jurnalistlər məlumatsız qalanda nəysə məlumat vermək ehtiyacından bəzən əsassız məlumatlar ötürə bilirlər. Ona görə də, bunların qarşısını almaq lazımdır. Onsuz da hansı qəzet, hansı sayt, hansı reportyorun işlədiyi bilinir. Artıq auditoriya o reportyorları tanıyır. Bizim jurnalistlərimiz getdilər və birbaşa hadisə yerindən məlumatlar yaymağa başladılar. Ancaq onların özünün məlumatla təmin olunmasında problemlər görünürdü, boşluqlar hiss olunurdu.

Məlumat əldə edildikdən sonra bunu vermək olar, yox, olmazsa, onda bunu yerində dəqiqləşdirmək lazımdır, bunun üçün də nazirliyin səyyar informasiya büroları olmalı idi. Hücum edib bir yüksəkliyi almaq qalibiyyət deyil. Əgər orada əsgərlər möhkəmlənirsə, istehkam qurulursa, 100% əks hücumun qarşısını almağın mümkün olduğundan əmin olduqdan sonra yüksəkiliyin ələ keçirilməsi ilə bağlı məlumatlar verilməlidir. Ona görə də, tələm-tələsik məlumat vermək olmaz. Bu baxımdan hərbi jurnalistlərin işi çox çətindir. Onlar birbaşa Müdafiə Nazirliyinin mətbuat xidməti ilə, hərbi mütəxəssislərlə işləməlidir və bu fəaliyyət koordinasiya olunmalıdır. Ekstremal situasiyanı işıqlandırmanın özəlliyi budur. Kimsə elə bilir ki, avtomat atılanda bunu xəbər vermək olar, amma bu çox yalnışdır".

Səxavət Məmməd
Ölkə.Az