\"S-300\"lərin birinci partiyası İrana təhvil verildi
Ölkə.az xəbər verir ki, İranla Rusiya arasında bağlanmış müqaviləyə əsasən S-300 zenit-raket komplekslərinin Tehrana təslimatı başlayıb.
İran XİN-nin rəsmi nümayəndəsi Caberi Ənsari mətbuata verdiyi açıqlamada bildirib ki, artıq S-300 komplekslərinin birinci partiyası İrana çatıb və ölkənin müdafiə nazirliyi tərəfindən təhvil götürülüb.
Xatırladırıq ki, Moskva və Tehran arasında 2007-ci ildə bağlanmış müqaviləyə əsasən Rusiya İrana 5 ədəd S-300 divizionu satmalı idi. 2010-cu ildə BMT Təhlükəsizlik Şurası İrana ağır silahlar satmağa qadağa qoyulması ilə bağlı qətnamə qəbul etdikdən sonra S-300-lərin satışı ləngimişdi. Daha sonra İran Rusiyadan müqaviləni yerinə yetirmədiyinə görə 4 milyard dollar təzminat tələb etmişdi. Yalnız bundan sonra Moskva raket komplekslərini Tehrana təhvil vermək qərarına gəldi.
