Azərbaycanda mövsümi xəstəliklər artıb

Soyuqların bitməsi, baharın gəlişi əhval-ruhiyyəmizə yaxşı təsir edir. Lakin isti hava, günəş, çiçəklərin və ağacların tumurcuqlaması bəzi xroniki xəstəliklərin oyanmasına səbəb olur.

Ölkə.Az xəbər verir ki, terapevt Səyalı Rəsulova Kanal S-ə açıqlamasında deyib ki, adətən bu vaxtlarda bəzi insanlarda allergik əlamətlər özünü biruzə verir. Mövsümi allergiyalar təbiətdə baş verən dəyişikliklərlə əlaqədardır.

Onun sözlərinə görə, allergik xəstəliklər ilin bütün fəsillərində baş verə bilər. Lakin, insan orqanizmindən asılı olaraq bəzi allergiyalar mövsümi xarakter daşıdığından, əsasən yaz və payız aylarında özünü daha qabarıq şəkildə göstərir. Baharın gəlişi ilə orqanizmin müxtəlif nahiyyələrində əmələ gələn qıcıqlanmalar narahatlığa əsas verir.

El arasında “Bahar xəstəliyi” də adlanan allergiya ağacların çiçək açdığı ərəfədə daha da fəallaşır. Səbəb isə çiçəklərin tozlanması dövründə havada allergik maddalərin miqdarının artmasıdır.

Dəridə, gözdə qızartı, qaşınma, səpmə və bu kimi əlamətlər meydana çıxdıqda dərman və ya digər müalicəvi üsullardan istifadə etməzdən öncə mütləq həkimə müraciət edilməlidir.

Sözsüz ki, yaz fəslində ətraf mühitə xüsusi gözəllik verən çiçəklər nə qədər göz oxşasa da, zərərli tərəflərindən də qorunmaq lazımdır. Əks təqdirdə səhhətinizdə problem yaşanacağı qaçılmaz olacaq. Bunun üçün isə özünüzə bir neçə qayda hazırlamaq, xüsuilə maskalardan istifadə etmək, müalicəni vaxtında edib özünüzü qorumalısınız.