"Makiyaja ehtiyacım yoxdur" deyən Ərdoğanın makiyaj xərcləri üzə çıxdı
"Mən makiyaj etdirmərəm" deyən Türkiyə prezidenti Ərdoğanın Ədalət və İnkişaf Partiyasına (AKP) rəhbərlik etdiyi vaxtlarda makiyaja ödənilmiş xərcləri haqda məlumat yayılıb.
Ölkə.Az xəbər verir ki, İstanbulun bələdiyyə sədri olduğu zamanlar "makiyaj edən qadınların kapotu xarabdır" deyərək tənqidlərə səbəb olan Ərdoğanın makiyaj xərcləri haqda sənədlər üzə çıxıb. Konstitusiya Məhkəməsi siyasi partiyaların 2011-ci il xərclərini təhlil edərkən Ərdoğanın baş nazir və AKP rəhbərliyi dövründə partiya büdcəsindən makiyaj pulu ödədiyini ortaya çıxarıb.
Ərdoğan 2011-ci il seçkilərinə hazırlaşarkən televiziya proqramlarına və mitinqlərə çıxmadan öncə etdirdiyi makiyajın pulunu partiyanın büdcəsindən qarşılayırmış. Sənədlərdən bəlli olub ki, partiyanın qərərgahında işləyən makiyajçı qadın üçün təqribən hər "bəzənmə" üçün 400 türk lirəsi (təqribən 200 manat) ödənilib. Konstitusiya Məhkəməsi isə hesabatda makiyaj xərclərinin partiyanın büdcəsindən qarşılanmasının qanun pozuntusu olmadığını qeyd edib.
"KAPOTU XARABDIR"
Ərdoğan İstanbul bələdiyyəsinin sədri olduğu vaxtlar makiyaj etdirən qadınlar haqqında mənfi fikir bildirmiş və bu ictimaiyyət arasında birmənalı qarşılanmamışdı.
Ərdoğan 1996-ci ildə verdiyi açıqlamada heç vaxt makiyaj etdirmədiyini bildirmiş və yaşadığı bir hadisəni belə nəql etmişdi:
"Bir dəfə bir jurnalist gəldi, qarşıma keçib ayağını ayağının üzərinə aşırıb oturdu. Mənimlə məzələnirmiş kimi makiyaj çantasını çıxardı. Qaşlarını, sağını solunu pudralamağa başladı. "Cənab sədr, siz makiyajın əleyhidarısınız", - dedi. "Mən istifadə etmirəm, sizin yəqin ki, ehtiyacınız var", - dedim. Təəccübləndi, o qadına dedim ki, "Kapotu köhnə maşınlar olar, onları makiyaj edərlər, boyayarlar. Mənim kapotum möhkəmdir, makiyaja da ehtiyacım yoxdur".
