"Borjomi"nin satış hüququ "Gilan Holdinq"dən alındı

Heydərovun biznes-inperiyasına daha bir zərbə endirildi.

Ölkənin ən iri oliqarxı olan FHN başçısı Kəmaləddin Heydərovun biznesi planlı surətdə çökdürülür

Redaksiyamıza mötəbər mənbədən daxil olan sensasion məlumatda məşhur və çox populyar mineral su markası "Borjomi"nin Azrbaycanda satış hüququ fövqəladə hallar naziri Kəmaləddin Heydərova məxsus "Gilan Şirkətlər Qrupu"ndan alınaraq  "Veysəloğlu" şirkətinə verilib.

Azərbaycan bazarındakı illik dövriyyəsinin 20 milyon manata yaxın olduğu bildirilən "Borjomi" mineral sularının ölkəyə gətirilməsi və satış hüququ indiyədək "Benkons" şirkətinə məxsus olub. Adı çəkilən şirkət "Gilan" qrupuna daxildir. 

Qeyd edirik ki, Azərbaycanda "Gilan" şirkətlər qrupu tərəfindən təsis olunmuş onlarla belə firma var və bu firmalardan ölkəyə gətirilən müxtəlif malların inhisara alınmasında istifadə edilir. Təsisçiləri haqqında heç bir məlumat olmayan bu MMC-lərin demək olar ki, hamısının başı Kəmaləddin Heydərovun şirkətlərinə çıxır.

Maraqlıdır ki, ərzaq məhsulları başda olmaqla ölkəyə idxal olunan müxtəlf təyinatlı malların gətirilmə və satış hüququ məhz bu firmalara verilib. Daxili bazardakı qiymətlərin artımı və illik inflyasiya dərcəsinə belə təsir göstərən monopoliya artıq yuxarıların diqqət mərkəzindədir. "Borjominin" inhisarının  "Gilan Şirkətlər Qrupu"ndan alınması isə Heydərovun çökdürülməsi üzrə başlanmış əməliyyatın ilk dalğası hesab edilir. Mənbə bildirir ki, yaxın gələcəkdə digər məhsulların idxalı və satışı da "Gilan Holdinq" və onun ətrafındakı şirkətlərin alınacaq.

Mənbə həmçinin bildirir ki, Kəmaləddin Heydərovun Azərbaycan iqtisadiyyatını sarmış inhisar şəbəkəsi hədəfə götürülüb. Ölkəyə gətirilən və dəyərindən qat-qat baha satılan malların başda fövqəlnazir olmaqla onun ətrafındakı "inhisar mafiyası"na hər il qazandırdığı  milyardlarla manat isə vergilərdən və büdcədən yayındırılaraq ölkədən xaricə axıdılır. 

Olke.az-ın Monitorinq qrupu