Suraxanı İcra Hakimiyyəti 16 il mənzil növbəsində olan əlilə ev tikməyə icazə vermir

 

Kirayədə yaşayan Ələkbər Əliyev musavat.com-a müraciət edərək deyir ki, 16 ildir, evsiz olması az deyilmiş kimi, indi də qohumlarının dəstəyi ilə fərdi yaşayış evi tikməsinə icra hakimiyyəti icazə vermir.

“16 ildir ki, evim yoxdur. Bir övladım var. Bəs, mən nə qədər kirayədə yaşamalıyam?”- deyə sual edir.

 

Ə.Əliyev hazırda Hövsan qəsəbəsindəki F.Bayramov küçəsində yaşayır. 

 

İkinci qrup əlil kimi 2000-ci ildən mənzil növbəsindədir. Suraxanı Rayon İcra Hakimiyyətinə etdiyi rəsmi müraciətinə cavab olaraq da bildirilib ki, o, həqiqətən də 2000-ci ildən mənzil növbəsindədir. Lakin 16 ildir ki, həmin növbə gəlib, çatmaq bilmir.

 

Bundan əlavə Ə.Əliyev həmçinin torpaq sahəsi almaq üçün də növbəyə durub. İkinci qrup əlil artıq 11 ildir ki, ona torpaq payı ayrılmasını gözləyir. Ə.Əliyev sonuncu dəfə 2009-cu ildə Hövsan bələdiyyəsinə müraciət edib. Müraciətə verilən rəsmi cavabda bildirilir ki, Ə.Əliyev 2005-ci ildən torpaq növbəsindədir və ümumi siyahı üzrə 1349-cu ailədir. 

 

Ancaq II qrup əlilliyi nəzərə alınaraq, o, güzəştli siyahı üzrə 675-ci ailə kimi qeydiyyata alınıb. Bələdiyyədən bildirilib ki, torpaq sahəsi ayrılacağı təqdirdə, Ə.Əliyev də torpaq sahəsi ilə təmin ediləcək.

 

II qrup əlil deyir ki, bu illər ərzində nə mənzil, nə də torpaq sahəsi ala bilib. Qohumlarının və ailə üzvlərinin köməkliyi ilə Suraxanı rayonunda torpaq sahəsi alıb. Həmin ərazidə fərdi yaşayış evi tikdirmək istəsə də, icra hakimiyyətindən icazə verilməyib.

 

Ə.Əliyev iddia edir ki, icra hakimiyyəti bunun qarşılığında müəyyən məbləğdə qeyri-rəsmi ödəniş tələb edir. Bu ödənişi edə bilmədiyindən ondan rəsmi sənədlərin hazırlanması tələb olunub: “Əgər pulunu versəm, tikə bilərəm. Ancaq yoxdur. Buna görə də evimi tikməyə icazə vermilər. Torpaq sahəsini qohumlarımın köməyi ilə almışam. Həmçinin evi tikməkdə də onlar kömək edəcək. Mən hardan alım 3 min manatı və icra hakimiyyətinə pul verim? 16 ildir ki, evsizəm. İndi özümə ev tikə bilmirəm. Ev, torpaq sahəsi vermirlərsə, heç olmasa, icazə versinlər, özüm tikim”.

 

Fərdi yaşayış evinin tikintisi ilə bağlı Ə.Əliyevin icra hakimiyyətinə müraciətinə icra başçısının müavini Etibar Yolçuyev cavab verib. E.Yolçuyev rəsmi sənədlərin hazırlanmasını tələb edib.

 

II qrup əlilin qarşılaşdığı problemlərlə bağlı Suraxanı Rayon İcra Hakimiyyətinin mövqeyini öyrənmək üçün icra başçısının müavini E.Yolçuyevlə əlaqə saxlamağa çalışdıq. İcra başçısının müavini ilə danışmaq cəhdimiz alınmadı. 

 

Telefona cavab verən icra hakimiyyətinin əməkdaşı bildirdi ki, E.Yolçuyev icra başçısının yanındadır. Daha sonra bizimlə əlaqə saxlayacaqlarını bildirsələr də, sorğumuza cavab vermədilər.