Gəncə sakinləri məsafədən idarə olunan ev düzəltdilər
İxtiraya cəmi 70 dollar xərclənib.
Evdən çıxandan sonra yada düşür ki, televizoru, kompüteri və ya qızdırıcını söndürməmisiniz... Narahat olmağa dəyməz. Telefonu götürürsünüz və cəmi bir zənglə problemi aradan qaldırırsınız. Yox, bu dosta zəng deyil. Heç qonşunu da narahat etmirsiniz. Həmin cihazları ev özü söndürəcək. Təbii ki, əgər sizin eviniz kifayət qədər ağıllıdırsa...
Xarici ölkələrdə "Ağıllı ev" adlandırılan sistem tədbiq edilir. Əsas məqsəd odur ki, evdəki elektrik avadanlıqları vahid mərkəzdən idarə edilsin və hər hansı təhlükə sezildikdə ev sahibi xəbərdar olunsun. Xaricdə bu cür sistemlərin qiyməti on minlərlə dollardır. Elxan Hüseynov və Rəşad Səidov isə analoji sistemi cəmi 70 dollara ərsəyə gətiriblər. Mühəndis-elektronik olan gənclər hazırladıqları qurğu vasitəsilə evdəki elektrik cihazlarını məsafədən idarə edə bilirlər.
Qurğunun üstün cəhətlərindən biri də onun evdə qaz sızması baş verdikdə xəbər etməsidir. Bunu əyani sürətdə yoxladıq, evdə qaz sızmasının olması ilə bağlı telefona mesaj gəldi və eyni vaxt hava təmizləyici işə düşdü.
Evdəki cihazları idarə etmək üçün mobil telefon vasitəsilə qurğuya "komanda" mesajı göndərilir. Mesaja uyğun olaraq qurğu əmri yerinə yetirir və cavab mesaji göndərir. Bu yolla evin işıqlarını yandırıb-söndürmək, kompüter, televizor və sair avadanlıqları idarə etmək olar.
Rəşad Səidov - mühəndis-elektronik: "Məsələn, suvarma sistemində bunu işlətmək olar. Artezianla hər hansı bir ərazini suvarmaq istəyirsinizsə, siz sms göndərə bilərsiniz. Sizə məlumat gələcək ki, artezian işə düşdü. Ərazi suvarılır. Uzaqdan evdə olan kombini də işə salmaq olar".
Qurğuya mesaj istənilən növ telefonlardan göndərilə bilər. Qurğunu zəng və "bluetooth" vasitəsilə də idarə etmək olar. İstəyə uyğun olaraq yazılan "komanda"ların sayını artırıb-azaltmaq da mümkündür. İxtiraçılar bildirir ki, bir evdə bu sistemi qurmaq üçün 3-4 gün vaxt sərf edilir. Amma onlar bu texnologiyanı satmaq və ya kütləvi istehsala başlamaq barədə düşünmürlər. Özlərinin dediyinə görə, bunu yalnız maraq xətrinə ediblər. Amma dünyanın bəzi ən nəhəng şirkətləri də adi bir maraqdan başlayıb. Kim bilir, bəlkə bu da hansısa böyük bir işin kiçik bir başlanğıcıdır... (Region TV)
