Diqqət! Avtomobiliniz əlinizdən alına bilər
Etibarnamə ilə alınan maşın böyük problemlər yarada bilər.
Ekspert açıqlama verdi - ikinci əl avtomobil alarkən ehtiyatlı olun.
Bir çox insanlar avtomobil alqı-satqısı zamanı etibarnaməyə üstünlük verirlər. Amma düşünmürlər ki, etibarnamə ilə aldıqları avtomobil sonradan böyük problemlər yarada bilər. Hətta bu problem avtomobilin əldən çıxması ilə də nəticələnə bilər.
Nahid Turabov - sürücü: “Əvvəl etibarnamə idi vaxtı qurtarırdı məcburiyyət qarşısında qalıb keçirdim öz adıma.”
Araşdırmamız onu göstərdi ki, əksər sürücülərin etibarnamənin sonradan yarada biləcəyi fəsadları barədə bir o qədər məlumatı yoxdur. Dövlət Yol Polisi sizi saxlayıb maşını müsadirə edərsə, heç də təəccüblənməyin. Etibarnamə ilə aldığınız maşının ya ödənilməmiş cərimələri, ya da üzərində məhkəmə həbsi olduğunu nəzərə alın. Bəs belə hallarla qarşılaşmamaq üçün nə etmək lazımdır?
Emil Vəliyev - Lənkərann şəhər DYPB-nin inspektoru: “Nəqliyyat vasitələrin sahiblik hüququ olan şəxslərdən etibarnamə alarkən onların müddətlərinə fikir versinlər. Nəqliyyat vasitələrinin üzərində olan inzibati cərimələri Dövlət Yol Polisi bölməsinin əməkdaşlarına yaxınlaşıb, öyrənib və həmin cərimələrin dövlət büdcəsinə ödənilməsin təmin etsinlər.”
Digər bir hal isə onunla bağlıdır ki, etibarnamə mülkiyyəti təsdiq edən sənəd deyil. Yəni məsələn etibarnamə ilə avtomobil almısınızsa bu hələ o demək deyil ki, o tamamilə sizə məxsusdur.
Ehtiram Fəttayev - ekspert: “Etibarnaməni verən şəxs istənilən vaxtı onu Notariat Kontorunda ləğv etdirə bilər, və etibarnamə verən şəxs öldükdə belə etibarnamə etibarsız hesab edilə bilir.”
Belə olan halda mülkiyyət hüququ ölən şəxsin varislərinə çatır. Bu zaman vərəsələr maşının etibarnamə müddətini uzada və yaxud da başqasına sata bilərlər. Çox hallarda isə həmin əmlak etibarnaməni verən şəxsin mülkiyyətində qalır və gələcəkdə problemlərə yol aça bilir.
Ehtiram Fəttayev - ekspert: “Ona görə də etibarnaməni alan şəxs etibarnaməni aldıqdan sonra əmlakı rəsmiləşdirmək səlahiyyəti verilibsə, həmin əmlakı qısa müddətdə rəsmiləşdirməlidir.”
Əgər bu və ya digər problemlərlə qarşılaşmamaq istəmirsinizsə bundan sonra maşın alan zaman mütləq alqı-satqı müqaviləsi imzalamalı, avtomobili öz adınıza keçirməlisiniz. (Region TV)
