\"Akif Nağının boşboğazlığına qulaq asmaqla Qarabağı azad etmək olmaz\"

Qarabağ Azadlıq Təşkilatının sədri Akif Nağı ilə Azərbaycan Sosial-demokrat Partiyasının sədri, deputat Araz Əlizadə arasında söz müharibəsi davam edir.

Artıq tənqidlər təhdid və qarşılıqlı təhqirə keçib. QAT sədri Akif Nağı bildirib ki, "Araz Əlizadə harada qarşıma çıxsa, onun alnının ortasından bir yumruq vuracam ki, gözündən qığılcım çıxsın. Öləcəkmi, yoxsa ağıllanacaqmı, bunu deyə bilmərəm, amma şok keçirəcək. Ölüb eləsə, hər kəs düşünsün ki, günah məndə deyil, onun özündədir".

Akif Nağının təhdidlərinə millət vəkili Araz Əlizadə Ölkə.Az-a verdiyi açıqlamasında münasibət bildirib:

"Bu kəlməni oradan götürüb ki, müsahibə verəndə demişəm, "Yekə kişidir, ayıbdır, şüşə sındırmasın. Sözü var gəlsin mənimlə üzbəüz desin, elə vuraram ki, yerə sərilər". İndi Akif Nağı plagiatla məşğuldur. Dediyimi təkrar edir. Ayıbdır axı, başqa bir şey fikirləşsin.

Akif Nağı bir şeyi yadda saxlasın, AXCP dövründə o da AXCP üzvü idi, mənə 4 dəfə sui-qəsd oldu, ancaq məni öldürə bilmədilər. O ki, qaldı Akif Nağının adamı mənə nə isə edə bilsin, qoy unutmasınlar, mən öləndə ya vətən uğrunda öləcəm, ya da öz əcəlimlə öləcəm. Məni zorakırıqla öldürmək mümkün deyil.

Akif Nağı mənə Çarli Çaplinin bir filminin qəhramanını xatırladır. O, bir uşağı götürür tərbiyə etməyə, bu uşaq da gedir şüşələri sındırır. Çarli Çaplin də pul qazanmaq üçün ardınca gedib sındırılan şüşələri yerinə qoyur. Əslində bu bir biznesdir. Akif Nağı bir şeyi dərk etməlidir, Yasir Ərafat Fələstin Azadlıq Təşkilatının rəhbəri olanda əlində avtomat Fələstində mübarizə aparırdı. Akif Nağı isə iclas keçirir, qrant alır, şüşə sındırır. Qarabağın azadlığının icraçısı ali baş komandan, prezident İlham Əliyevdir. Akif Nağı Qarabağı azad edə bilməz. Onun ətrafındakılar başa düşməlidirlər ki, topları yox, topxanaları yox, onlar Qarabağı necə azad edə bilərlər? İclas keçirib Akif Nağının boşboğazlığına qulaq asmaqla Qarabağı azad etmək olmaz. Ona qalsa bütün sağ müxalifət Qarabağı hər gün azad edir".

Akif Nağının hədələri ilə bağlı məhkəməyə müraciət edib-etməyəcəyi məsələsinə gəldikdə isə Araz Əlizadə bildirdi ki, "hər hürən itin ağzına sümük atmıram". Akif Nağının Sosinternin iclasında Araz Əlizadənin qaçıb tualetdə gizlənməsi ilə bağlı səsləndirdiyi fikrə isə deputat "tualetdən su içən Akif Nağının özüdür", deyə cavab verib.

Səxavət Məmməd
Ölkə.Az