Azər Qismət 400 nəfər arasında birinci oldu
Manera.az saytının bir müddət əvvəl elan etdiyi müsabiqənin nəticələri açıqlandı.
“Ən yaxşı hekayə", "Ən yaxşı şeir" , "Ən yaxşı tərcümə" nominasiyaları üzrə elan edilən müsabiqənin qaliblərinin adları “Akademkitab” kitab evində keçirilən ədəbi-bədii tədbirdə açıqlandı. Tədbirdə tanınmış ədəbiyyat adamları və media nümayəndələri iştirak etdi. Qeyd edək ki, bu müddət ərzində ölkənin əksər tanınmış yazıçıları müsabiqənin “Ən yaxşı hekayə” nominasiyasına öz nəsr əsərlərini göndəriblər. 15 nəfərdən ibarət münsif heyətinin birgə qəbul etdikləri son qərara əsasən Azər Qismətin “Hamilə dəli” əsəri ölkə üzrə hekayə müsabiqəsinin qalibi elan olunub.
Ədəbiyyat və mədəniyyət portalı Manera.az-ın baş redaktoru Şəhla Aslan çıxışında bildirib ki, qiymətləndirmə tam obyektiv şəraitdə keçib. Ədəbiyyat müsabiqəsinin növbəti ildə daha möhtəşəm keçiriləcəyini qeyd edən saytın rəhbəri qalibləri təbrik edib, onlara yeni yaradıcılıq uğurları arzulayıb.
Bu münasibətlə Manera.az saytını 1 illik yubiley münasibətilə təbrik edirik. Tanınmış telejurnalist Azər Qismətə isə yeni yaradıcılıq uğurları arzulayırıq. Xatırladaq ki, Azər Qismət 2000-ci ildən Azərbaycan Yazıçılar Birliyinin üzvüdür, onlarla hekayə və publisistik, eləcə də minlərlə süjetin müəllifidir.
