Aşıq Zülfiyyənin çarpayısı, Kənanın yekəxanalığı, Xoşqədəmin hidayəti və İlhamənin Orxanı
Ölkə.Az milli.az-a istinadən jurnalist İntiqam Valehoğlunun müəllif layihəsi olan "Həftəbecər"i (74-cü say) təqdim edir.
Çoxdandır Qulpqoyan dayıdan yazmıram, oxucular az qalır şərhlərdə başımı yaralar. Elə bil ki, "Həftəbecəri" mən yox, Qulpqoyan dayı yazır. O gün özü yazdıqlarınızı oxuyub, hamınıza da salamı var. Dedi ki, gedirəm İrana, qayıdanda başıma gələnlərdən danışacağam. Öz aramızdı bu kişi, deyəsən, beynəlxalq səviyyəli biznesmen olub, xəbərimiz yoxdu.
Aşıq Zülfiyyə son üç ildə ilk dəfə gəlinindən və oğlundan danışmayıb. Amma inanın ki, verilişdə aparıcılar da ona özündən əvvəl oğlu və gəlini haqda sual verirlər. Hərdən mənə elə gəlir ki, Azərbaycanda Zülfiyyədən başqa oğlu və gəlini olan adam yoxdur. Sağ olsun, bu dəfə mövzunu dəyişib. Bircə bu Telli Borçalının da "nervili kişi" söhbəti yekunlaşsaydı, dərdimiz olmazdı. Deməli, Zülfiyyə boşanan sənətçiləri üstüörtülü formada ələ salıb. Hər halda bunun başqa adı yoxdur. Deyib ki, sənətçilər boşanırlar, sonra da deyirlər ki, incəsənət qurban tələb edir:
"Mən deyərdim ki, incəsənət ağıl tələb edir. Adətən söz-söhbətlər dünya malına görə olur. Qadın deyir ki, filankəs filan briliyantı taxdı, mənim niyə yoxdur, filan xəzi geyindi, mənim də olmalıdır. Mən də çox çətinliklər çəkmişəm. İkinci paltarı almaq üçün birinci paltarımı satmışam, üstünə pul qoyub başqa paltar almışam. Amma bunu nə anam bilib, nə başqa bir adam. Heç kim deməsin ki, birdən-birə gəlmişəm. Məndən yaşca kiçik olan sənət dostlarıma məsləhət görmüşəm. Deyir, filankəs filan maşına minir. Demişəm ki, əsas olan ailə xoşbəxtliyidir. Biz ailə quranda bir otağımız, bir dəmir çarpayımız, bir stol, iki stulumuz var idi, indi heç nəyə ehtiyacımız yoxdur. Çünki bir-birimizə can deyib, can eşitdik. Bəzən qızın ailəsi tərəfdən olan müdaxilələr də ailələrin dağılmasına səbəb olur. Fikrimcə, evdə son qərarı kişi verməlidir".
Əslində, fikir kimi bu deyilənlər çox yaxşı, hətta deyərdim ki, əla səslənir. Amma necə deyərlər, avazın yaxşı gəlir, oxuduğun "Quran" olsa. Demək istədiyim odur ki, aşığın dedikləri yalan deyilsə, halal olsun.
Rejissor Kənan M.M-i çox adam yekəxana, özündənrazı adam kimi tanıyır. Amma mən bunun belə olmadığını bir neçə cümlə ilə sübut edə bilərəm. Bir dəfə həmkarım Səxavət Məmməd çox kasıb ailə haqda reportaj hazırlamışdı. Yazını mən də sosial şəbəkədə paylaşdım. Dostluğumda isə beş yüzə yaxın sənət adamı var. İnanın ki, təkcə Kənan mənimlə əlaqə saxlayıb, həmin ailəyə kömək etmək istədiyini bildirdi və etdi. Xahişi də bu oldu ki, etdiyi kömək barədə yazmayım. Son günlər onun barəsində yazılan tənqidi fikirlər, yarı obyektiv, yarı subyektiv şərhlər, doğrusu, "mərdi qovub namərd etmək"dən başqa bir şey deyil. Məncə, necə ki, Röyanı, nə bilim Aygünü necə var elə qəbul edirsinizsə, Kənan bu adamların heç birindən kəm deyil. Yeri gəlmişkən, bir gənc sənətçi rejissor qardaşımızı bərk hirsləndirib. O da götürüb qəşəng bir status yazıb:
"Bir gənc müğənni xanıma söz deməliydim. Mənə dedi ki, menecerimlə əlaqə saxlayarsan. Mənə e, özü də mənə. Biri ona başa salsın ki, biz menecer zad sevmirik. On beş ildir telefonuma özüm cavab verirəm. Hoppanalar sənin menecerinə".
Son cümlənin düzəlişə ehtiyacı var. Məncə, hoppanalar yox, hoppanım olsa, daha uğurlu səslənərdi.
Xoşqədəm ötən ilin bu vədələri bir qrup televiziya işçisini özü ilə ATV-dən ANS-ə aparmışdı. Onlar da şələ-şülələrini yığıb kabab iyinə getmişdilər. O gün eşitmişəm ki, telekanaldan uzaqlaşdırılıblar. Aydın məsələdir, istənilən yerdə ixtisar mümkündür. Amma sən bu adamları özünlə aparmısansa, işindən-gücündən etmisənsə, indi arxasında durmağa borclusan. Bəs bu adam nə edib? Götürüb mənadan və məntiqdən kənar bir status yazmaqla guya məsələni həll edib. Diqqətlə oxuyun, sonra deyəcəklərim var:
"Mənim sevimli kanalım, ən çətin anımda yanımda olan, hər kəsin kanalı ANS-in şüarı necə də bizə yaxındır - Döyüş alnımıza yazılıb! Ay dostlar, vallah, yazdığınızı oxumağa vaxtım yoxdur. Eşidirəm ki, həmişə məndən yazırsınız. Lütfən, yazarkən yalan xəbər yazmayın və kimisə ləkələməyə çalışmayın. Çünki o insanlar əldə etdiklərini öz zəhmətləri ilə qazanıblar. Ona görə də zəhmətkeş insanlara haqq etdikləri dəyəri veriblər. Nəinki mənim, kimsənin haqqını tapdalamayıblar. Allah onlardan razı olsun! Fitnə, fəsadla məşğul olub, kimisə ləkələməyə, ara vurmağa çalışan dostlarımıza da Allah hidayət etsin!"
Birincisi, əgər oxumağa vaxtınız yoxdursa, bəs bu statusu hansı düşüncəylə yazmısınız? Olmaya sizin göylərlə əlaqəniz var, mən bilmirəm. Lap tutaq ki, eşidirsiniz. Doğrudanmı bu boyda faktı danmağa cəsarətiniz çatır. Ölkəmizin bu başından o başına on saatlıq yoldur. Yəni necə deyərlər, hamı bir-birini əla tanıyır. O ki qaldı hidayət məsələsinə, düşünürəm ki, buna sizin də yetərincə ehtiyacınız var. Bilirsiniz niyə? Çünki... və həm də ona görə ki, sizin yanınıza düşüb böyük ümidlərlə ATV-dən ayrılan adamlar indi hətta adlarının belə çəkilməsindən ehtiyat edərək, bu məlumatları bizə ötürürlər...
İradə İbrahimova Bakıya bir iş adamının xınayaxdısına gəlmişdi. Məlumat yayıldı ki, 20 minə gəlib, sonra sənətçinin mətbuat katibi çıxıb dedi ki, yalan söhbətdir. Doğrudan da, dəhşət sevindim. Çünki bu dəqiqə sənətçilər dədələrinin evlərinə az qala yarım saatı 5 minə gedib baş çəkirlər. Ona görə belə bir xəbər yaman xoş oldu. İnandığımımı düşündünüz? Ay-hay...
Dünən də mərhum xalq artisti İlhamə Quliyevanın oğlunun həbs xəbərini yayıblar. Oğlu da xəbəri təkzib edib ki, yalan söhbətdir. Xəbəri kimin hansı məqsədlə yazdırdığını deyə bilmərəm. Amma bircə onu bilirəm ki, atlar ölüb...
