Razi Nurullayev AXCP-nin dağılmasından danışdı

Media və sosial şəbəkədə Razi Nurullayevin rəhbərlik etdiyi AXCP-nin dağılması, üzvlərinin başqa partiyaya keçməsi barədə söz-söhbətlər gəzir.

Bununla bağlı AXCP sədri Razi Nurullayev Ölkə.Az-ın sualını cavablandırıb:

"Son zamanlar AXCP-nin dağılması, insanların başqa partiyalara keçməsi, narazılıqlarla bağlı fikirlər səsləndirilir. Bu fikirlərin hamısı yalandır və heç bir əsası yoxdur. Partiyamız əvvəlkindən daha da güclüdür. Partiyamızın artıq nəzəri ideoloji əsasları yaranır. Partiyada olan insanlarda partiyaya bağlılıq yaranır, insanların gələcəyə olan inamı artır. Partiyada sədrlə partiya üzvləri arasında olan bağlılıq daha da dərinləşir. Son zamanlar hiss etmişəm ki, partiyanın siravi üzvləri sədrə daha çox bağlanırlar. Bu da inamdan irəli gəlir. Mənim qarşımda duran əsas məqsəd odur ki, partiya üzvləri sədrə yox, partiyaya bağlansınlar. Bu proses artıq başlayıb.

Partiya varsa, oradan kimsə gedə bilər. Şükürlər olsun ki, bizim partiya açıq bir partiyadır. Partiyanın bütün fəaliyyəti medaiada əks olunur. Ola bilsin ki, kimlərinsə partiyadan gözləntiləri olub, o gözləntilər baş tutmadığı üçün başlayıblar partiya haqqında bu və ya digər fikirlər səsləndirməyə. Bu fikirlər də məni qorxutmur. Partiya haqqında nə qədər tənqidi fikirlər olarsa, kimlərsə onun haqqında şayələr yaymağa qalxarsa, kimlərsə partiyanı müzakirəyə çıxararsa, bu partiyanın yaşamasının, partiyanın güclənməsinin göstəricisidir. Niyə hər partiya haqqında danışmırlar? Bizim işimiz varsa, bu haqda danışılacaq.

Biz önümüzə baxırıq. Bilirik ki, yolumuz haqq yoludur. İşimiz şəffafdır. Şəffaf yolumuzla, partiyamıza bağlılığımızla yolumuza davam edirik. Bu tip şaiyələrin yayılması da partiyamızın ziyanına yox, xeyirinə işləməkdədir".

Ölkə.Az AXCP sədri Razi Nurullayevin AXCP-nin dağılması barədə yayılan xəbərlərlə bağlı Videomüsahbəsini sizə təqdim edir:

Səxavət Məmməd
Ölkə.Az