"Dünya dövlətləri dollar ekspansiyasından xilas olmaq üçün birləşirlər"

Son günlər NATO ilə Rusiya arasındakı gərginlik daha da artıb.

NATO-nun Avropadakı qüvvələrinin komandanı general Kertis Skaparotti Rusiyanı müharibə ilə təhdid edib. Bundan əlavə ABŞ prezidenti Obama, Putin NATO və Avropa İttifaqını Rusiya üçün təhlükə mənbəyi saydığını deyib.

Obama bildirib ki, Putinlə görüşümdə ona demişəm ki, həqiqətən də vahid və inkişaf etmiş Avropa ilə əməkdaşlıq yalnız Rusiyanın xeyrinə olar. Amma təəssüf ki, ona bunu başa salmaq və onun fikrini dəyişmək mümkün olmayıb.

ABŞ-Rusiya münasibətləri barədə politoloq Adıgözəl Məmmədov Ölkə.Az-a danışıb:

"Şanxay əməkdaşlıq təşkilatının bir tədbiri var idi, orada iştirak etdim. O tədbirdə də, Rusiya-ABŞ, Rusiya-NATO, Rusiya-Avropa İttifaqı münasibətləri müzakirə edildi. Çinin, Hindistanın, Pakistanın ekspertləri, əsasən ABŞ-ın dollar vasitəsi ilə dünyanın bir sıra dövlətlərinin iqtisadiyyatına təsir etməsindən danışdılar.

Son dövrlər bir çox dövlətlərin ABŞ-a və NATO-ya qarşı çıxmaları Rusiyanın təşəbbüsü deyil. Son dövrlər ABŞ-ın dollar ekspansiyasından xilas olmaq üçün bir təmərküzləşmə gedir. Nə qədər iqtisadiyyata investisiya qoyulursa, bir o qədər çox dollarla olan məzənnələrə vəsait xərclənir. İqtisadiyyat sanki dollarla idarə olunur. Dollar da bildiyimiz kimi ABŞ-ın pul vahididir. Bu təmərküzləşmə iqtisadi platformada baş verir. Çin, Hindistan, Pakistan, Rusiya dollar ekspansiyasından xilas olmaq üçün artıq birləşməyə doğru gedirlər. Şanxay əməkdaşlıq təşkilatını artıq iqtisadi cəhətdən də formalaşdırmaq istəyirlər ki, iqtisadi təmərküzləşmə sürətlə getsin.

Artıq ABŞ siyasətçiləri başa düşür ki, dünya iqtisadiyyatına təsir etmək riçaqları günü-gündən əllərindən çıxır. Hətta Avropa da dollar girdabından çıxmaq üçün addımlar atır. Avropa dövlətlərinin başında Almaniya və Fransa durur. Əslində burada heç də Avropa-Rusiya qarşıdurması deyil, bütün bu görünən aysberqin altında dollar girdabından çıxmaq cəhdləri var. Çünki dövlətlər dollara görə iqtisadiyyatlarını inkişaf etdirə bilmirlər. Dollar elə bir təsir mexanizminə malikdir ki, nə qədər iqtisadiyyatı inkişaf edirirsən etdir, dollarla o iqtisadiyyatı zəiflədir və çökdürürlər. İstənilən siyasət dövlətin inkişafına, rifahına xidmət etməlidir. Dünyada baş verən savaşların, müharibələrin arxasında iqtisadi mənfəətlər dayanır. Rusiya Müdafiə Nazirliyinin bir nümayəndəsi ilə görüşdüm, mənə dedi ki, Suriya kampaniyasından sonra region ölkələrindən, ərəb ölkələrindən o qədər silah almaq təklifi gəlib ki, faktiki olaraq Rusiya zavodlarının bu sifarişləri həyata keçirmək üçün imkanları çatmır. Hər bir aparılan siyasətin bir görünən tərəfi var, bir də görünməyən tərəfi. Suriya kampaniyasında Rusiya silahlarını nümayiş etdirdi və buna görə də, silah sifarişinin ardı-arası kəsilmir".

Səxavət Məmməd
Ölkə.Az