Vasif Məhərrəmlinin tərbiyəsizliyi, "dilçi" Yusif və "köhnə" Xuraman
İntiqam VALEHOĞLU
Diqqətli oxucuların yadında olmamış deyil. İki gün öncə özümü Qəbələ sakini Kamran adı ilə təqdim edib bir neçə sənət adamının toy qiyməti ilə maraqlanmış, sonra söhbətimizi olduğu kimi yazmışdım. Nöşün ki, bu çalıb-çağıranların əksəriyyəti mikrofonu görəndə necə gül-çiçək açırlarsa, vergi söhbəti eşidəndə canlarına o tərzdə vəlvələ düşür. Məlum yazı təbii ki, əksər aparıcı saytlar tərəfindən dərc edildi və təvazökarlıqdan kənar da olsa, böyük səs-küyə səbəb oldu. Yazıdan sonra yalnız Bahar Lətifqızının prodüseri Vəfa Nuriyeva mənimlə əlaqə saxlayaraq, müəyyən nüanslara etirazını bildirdi, danışdıq, anlaşdıq.
Bu gün isə nə baş verib? Yusif Ağayev adlı aparıcı, həmin sənətçilərdən ikisini-Xuraman Şuşalını və Vasif Məhərrəmlini dəvət edib. Mövzu da deyəsən biznesdir. Bu da əla. Məlumat üçün deyim ki, proqramın digər qonaqları Rüfət Axundov və Xatirə İslamdır.
Ordan-burdan danışdılar, söhbət gəldi çıxdı İbrahim Tatlısəsin üstünə. Özü də Tatlısəsdən kim danışsa yaxşıdır? Yusif Ağayev. Ay İbrahim belə, İbrahim elə, axırda da qayıdıb deyəsən ki, əməlli-başlı reklam oldu ha Tatlısəsə. Adım kimi əminəm ki, Tatlısəs bilsəydi, onu Yusif Ağayev adlı aparıcı adını daşıyan şəxs reklam edəcək, daha doğrusu, ondan danışmağı reklam hesab biləcək, vallah-billah bir güllə də özü öz başına çaxardı. Yeri gəlmişkən, Yusifin mənə gizli "simpatiyasının" səbəbini də bilirəm. Yazılarımın birində onun Xarici Dillər Universitetinin məzunu olduğunu, dil mütəxəssisi kimi bacarığını yazmışam. O da eşitdiyimə görə inciyib ki, axı mən aparıcıyam, dilçi deyiləm, lap çox da ki, həmin ali məktəbi bitirmişəm. Nəysə, sözüm onda yox.
Elə söhbətin bu yerində Vasif də başladı ki, İbrahimə Türkiyənin yarısı da qurbandır, lap Yunanıstan torpaqlarının yerdə qalanının hamısı da. Yəni sənəti bunlara sahib olmağa imkan verirmiş. Əvvəla, Tatlısəs Türkiyədə dəfələrlə vergi rekordsmeni olub, Vasif Məhərrəmli kimi getdiyi toyun qiymətini vergi ödəmək gələndə 20 dəfə kiçiltməyib. Tatlısəs vergi rekordsmenidir, Məhərrəmli kimi vergi oğrusu yox.
Hələ söhbətin ardı var. Az sonra həm Vasif, həm Xuraman, həm də Yusif Ağayev tərbiyələrinin ən incə detallarına qədər ortaya qoyacaqlar.
Bir az keçir, Vasif bir neçə gün öncə ona etdiyimiz zəngdən danışır, jurnalistləri öz aləmində üç qrupa bölür. Yeri gəlmişkən, müğənni adını daşıyan bu şəxs jurnalistlərlə ən çox qalmaqal edən, hətta onlarla əlbəyaxa olan sənətçilərdəndir. Hətta bir dəfə tərbiyəsini göstərib etikadan kənar ifadələr də işlətmişdi və bu barədə mətbuat da yazmışdı. Başqa bir jurnalisti isə elə ATV-nin öz çəkiliş meydançasında vurduğu da unudulmayıb. Yəni bu adamın ifasına sözüm yox, amma bəzən hərəkətləri küçə uşağının hərəkətlərindən çox da yaxşı olmur.
Vasif deyir ki, jurnalistlər üç qrupa bölünür. Birincisi jurnalist, ikincisi peşəkar, üçüncüsü tülkü jurnalist. Dilçi olduğuna etiraz edən, jurnalist olduğunu düşünən Yusif Ağayev isə susur və qımışır. Vasif çoxdandır "palatka toyu"nda oxumadığını deyir və özünə hansısa formada haqq qazandırmağa çalışır. Axırıncı dəfə 78-ci ildə efirdə olmuş, hicaba keçəndən sonra heç bir efirə və sayta lazım olmayan Xuraman isə söhbətə öz aləmində "tırka" verir. Doğrusu mən düşünmüşdüm ki, Xuraman o yazıdan sonra mənə sağ ol deyəcək ki, itirib axtaran yox idi, yenə də sən yada saldın.
Yusif isə hesab edir ki, bizim etdiyimiz qanun pozuntusudur. Elə bundan ilhama gələn Vasif yazıda "tələyə düşən" sənətçiləri də səsləyir ki, gəlin bu jurnalisti məhkəməyə verək. Xub! Qardaş, gedin polisə verin, məhkəməyə verin, ərizə yazın, vəkil tutun, məni tutdurun, amma bunu bu formada etməyin. Başa düşürəm, sizə gündəm lazımdır, mən də bunu sizə yaratmışam. Daha belə tərbiyəsizcəsinə çıxışlar etməyə gərək yoxdur.
Vasif Məhərrəmli Çingiz Mustafayevdən danışır. Halbuki Çingizin adını ağzına almağa ixtiyarı yoxdur. Hər halda, döyüb-söydükləriniz də Çingizin həmkarları sayılır. Elə ən azı buna görə. Bir də ki, vaxtı olanda Məhərrəmli xələl sözünün tələffüz qaydasını öyrənsə, heç də pis olmaz.
Xatirənin isə məsələyə münasibəti nə qədər təəccüblü olsa da, bu dəfə başqa cür olur:
"Belə şeylərə əsəbləşməyin. Təki hamı müğənnilər kimi öz valideynlərinin, qardaşlarının dərd-sərini öz qazancı ilə həll eləsin, qəlb sevindirsinlər. Ondan sonra danışaq da. Jurnalist yazıb, yaxşı edib. Bəs nə etməlidir ki?"
Söhbətin bu yerində Yusif Ağayev müəllim yenə qımışaraq deyir ki, onun da çörəyi yazmaqdan çıxır da neynəsin? Düzdür, şəxsən mənim çörəyim yazmaqdan çıxır. Amma Yusifin çörəyi "toçnu" yazmaqdan çıxmır. Hər nədən çıxırsa, amma o yazmaq deyil.
P.S. Söhbətin bu yerində Şəmkirdən müəllifə zəng gəlir. Bəzi sənətçilər haqda çox maraqlı detallar danışıblar. Əgər yazılası olsa, tezliklə oxuyacaqsınız.
