Məleykə Abbaszadə balların aşağı salınması məsələsindən danışdı
“Təhsil nazirliyi ali məktəblərdə olan vəziyyəti araşdırıb”.
Dövlət İmtahan Mərkəzi publik hüquqi şəxsin Direktorlar Şurasının sədri Məleykə Abbaszadə ali təhsil müəssisələrində qəbul planını doldurmaq üçün balların aşağı salınması məsələsinə münasibət bildirib.
Ölkə.Az-ın Report-a istinadən məlumatına görə, Məleykə Abbaszadə “ASAN radio”nun “Qəbuldasan” verilişində bildirib ki, komissiya balları azaltmır, sadəcə müsabiqədə iştirak etmək üçün minimal tələbləri sadələşdirir:
“Ötən ildən başlayaraq bu prosesə Təhsil Nazirliyi də öz töhfəsini verdi. Nazirlik ali məktəblərdə olan vəziyyəti araşdırıb. Nəticədə məlum olub ki, müəyyən ixtisaslarda aşağı nəticə ilə daxil olan uşaqlar akademik nəticə əldə edə bilmirlər və belə qəbul olunub ki, həmin ixtisaslara ən azı 200-250 baldan yuxarı nəticə göstərənlər qəbul olunsun. Tələbə Qəbulu üzrə Dövlət Komissiyası bunu çox yaxşı qəbul etdi və keçən il tətbiq etdi”.
Sədrin sözlərinə görə, keçən il müəyyən ixtisaslarda abituriyentlərin göstərdiyi nəticəyə ilə vakant yerlərin sayı uyğun gəlməyib:
“Keçən il vakant yerlərin sayı müsabiqəyə buraxılan uşaqların sayından çox idi. Bu səbəbdən də keçid balı həmin ixtisaslarda 150 bala salındı. Təbii ki, bu, ödənişli təhsilə aiddir”.
