Pentaqon: Rus qırıcılarının manevri bölgədə müharibə təhlükəsi yaradır
ABŞ və Rusiya arasındakı hərbi gərginlik artır.
Ölkə.Az xəbər verir ki, Pentaqon Rusiyaya aid Su-27 qırıcılarının növbəti dəfə Baltik dənizində manevr edən ABŞ hərbi gəmisinin üzərində dövrə vurmasına sərt reaksiya verib.
Pentaqonun rəsmi nümayəndəsi Mişel Baldanzanın yaydığı açıqlamada ABŞ hərbi komandanlığı Rusiyanı növbəti dəfə xəbərdar edir və belə hərəkətlərin Baltik hövzəsində hərbi qarşıdurmanın eskalasiyasına gətirib çıxaracağını bildirir.
Pentaqonun yaydığı bəyanatda deyilir ki, Rusiya qırıcılarının bu hərəkəti böyük fəlakətə gətirib çıxara bilərdi və hər iki rus təyyarəsinin ekipajı üçün bu böyük risk idi. Pentaqon rəsmisi vurğulayıb ki, belə hallarda ABŞ hərbi gəmisi özünü təhlükədən qorumaq üçün rus təyyarələrini vurmaq məcburiyyətində qala bilərdi.
Xatırladırıq ki, rus qırıcıları bir müddət öncə yenə ABŞ hərbi gəmilərinin üzərində dövrə vuraraq böyük siyasi qalmaqala səbəb olmuşdular.
