Müdafiə naziri: "Estoniya NATO ərazisidir"
Baltikyanı regionda Rusiya və NATO arasındakı qarşıdurma şiddətlənir.
Ölkə.Az xəbər verir ki, NATO-ya intqrasiya yolunu tutmuş Baltikyanı ölkələr Rusiya və ABŞ-ın maraq toqquşmasının arasında qalıblar.
Ərazilərində NATO-nun hərbi bazalarının yaradıldığı Baltikyanı keçmiş sovet respublikaları Rusiyanın hədəfi halına gəliblər. NATO-nun genişlənməsindən narahat olan və qıcıqlanan Rusiya artıq Latviya, Litva və Estoniyaya potensial təhlükə mənbəyi və hədəf kimi baxır.
Gərginliyə münasibət bildirən Estoniyanın müdafiə naziri Hannes Hanso ölkəsinin NATO ərazisi olduğunu bildirib.
"Hazırda ölkəmizdəki Emare hərbi bazasında NATO-nun hərbi təyyarələri və quru birlikləri təlim keçir. Təəssüflər olsun ki, Rusiyanın ağılsız hərəkətlərinin ucbatından Avropa üzərindəki təhlükə çəkilməyib. NATO-nun Estoniyadakı qüvvələri isə alyansın sərhədlərini bu təhlükədən qoruyurlar", deyə Estoniyanın müdafiə naziri Rusiyanı təcavüzkarlıqda günahlandırıb.
