Razi Nurullayev: "O zaman Ter-Petrosyan Dağlıq Qarabağla bağlı sazişə imza atmağa hazır idi, amma..."

AXCP sədri Razi Nurullayev Vahid Qərar Şurasının mahiyyətini açıqlayıb

"AXCP Vahid Qərar Şurasının yaradılması ilə bağlı təklif irəli sürüb. Artıq bu təklif hökumətə də göndərilib, cavab gözləyirik"

Bu sözləri Ölkə.Az-a videomüsahibə verən AXCP sədri Razi Nurullayev deyib.

Razi Nurullayev bildirib ki, Vahid Qərar Şurasının yaradılmasını Dağlıq Qarabağ münaqişəsinin həlli üçün və bu münaqişənin həllində dönüş yaratmaq üçün vacib bir məqam hesab edirik. Çünki 20 ildən çoxdur ki, danışıqlar davam edir, ancaq nəticəsi yoxdur. Düşünürəm ki, həlli də olmayacaq. Bunun bir neçə səbəbi var.

AXCP sədri danışıqların heç bir nəticə verməməsinin səbəblərini açıqlayıb:

"Prezident danışıqlara gedən zaman narahatlıq keçirir. Düşünür ki, bu və ya digər qərarı verən zaman ölkəyə qayıdanda mənim üçün problem yaradıla bilər. 1988-ci ildə olanlar gözümüzün önündə baş verdi. Ermənistanın o zamankı prezidenti Ter-Petrosyan Dağlıq Qarabağla bağlı sazişə imza atmağa demək olar ki, razılaşmışdı. Sazişin imzalanması gözlənilirdi. Ermənistan Dağlıq Qarabağı Azərbaycana qaytarırdı. Ancaq o, 1998-ci ildə ölkəyə qayıdan zaman Koçaryan Petrosyanı hakimiyyətdən devirdi və təbii ki, xalqın hissləri üzərində oynadı ki, biz qan töküb, işğal etdiyimiz torpaqları bu heç nədən Azərbaycana qaytarır.

Bütün prezidentlər bu hissi yaşayır ki, düzgün bildiyim qərarı verərəm, misal üçün Azərbaycan prezidenti düşünə bilər ki, verdiyim qərar 6 ay sonra Dağlıq Qarabağın Azərbaycana qaytarılmasını təmin edəcək. Bunu insanlara necə izah etmək lazımdır, bunu da bilir, ancaq hakimiyyətdə gözü olan, siyasi iddiaları olan partiyalara bunu izah edə bilməyəcək. Çünki onlar bundan istifadə edərək hakimiyyəti devirmək istəyəcəklər. Bütün hakimiyyətlərdə bu qorxu olur. Bu qorxunu aradan qaldırmaq üçün Dağlıq Qarabağ münaqişəsinin həllində prezidentin əlini gücləndirmək üçün Vahid Qərar Şurasının yaradılmasını təklif edirik".

Razi Nurullayevin Vahid Qərar Şurası ilə bağlı daha geniş fikri ilə videomüsahibədə tanış ola bilərsiniz.

Ölkə.Az həmin videomüsahibəni sizə təqdim edir:

Səxavət Məmməd
Ölkə.Az