İranda erməni deputatlardan DİN-ə müraciət
Ötən həftə Qarabağda baş verən son olaylar İrandakı erməniləri ciddi təşvişə salıb. Həmçinin Güney Azərbaycanda yaşayan soydaşlarımızın Qarabağ məsələsi ilə bağlı həmrəylik nümayiş etməsi erməni deputatları və tərəfdarları arasında böyük narahatlıq doğurub.
Beləliklə, İranın erməni tərəfdarları olan asori, zərdüşt və kəlimi topluluqlarının məclisdəki təmsilçiləri güneyli soydaşlarımızın Qarabağın işğalına qarşı həmrəylik nümayiş etməsi ilə bağlı İranın Daxili İşlər Nazirliyinə şikayət ünvanlayıblar.
Ölkə.Az musavat.com-a istinadən xəbər verir ki, bu barədə İranda populyar olan Teleqram sosial şəbəkəsində məlumat yayılıb.
Açıq məktub şəklində ünvanlanan şikayətdə bildirilir: “Daxili İşlər Naziri, cənab Rəhmani-Fəzli, salam. Sayqılarımızla birlikdə elan edirik ki, keçən həftə baş verən Qarabağ münaqişəsini bəhanə edərək Təbrizdə, Urmiyada, Qərbi və Şərqi Azərbaycan əyalətlərinin bəzi şəhərlərində bəzi hərəkətlər (axınlar) ermənilərə qarşı təhrikçi işlərə əl atıblar ki, bu məsələ də erməni topluluğunu nigaran edib. Görünən odur ki, bu qruplar İslami birlik adı altında separatçılıq edirlər. Biz bu hərəkətlərə qarşı etiraz edir və sizdən bu vəziyyətin qarşısının alınmasını istəyirik”.
