"Times": Ərdoğan hiyləyə əl atıb
İngiltərənin çoxtirajlı "Times" qəzetində Türkiyə prezidenti Rəcəb Tayyib Ərdoğanın daha çox güc sahibi olmaq üçün tələ qurduğu və baş nazir Əhməd Davudoğlunu vəzifədən uzaqlaşdırma istəyinin əsl səbəbinin də bu olduğunu haqda məqalə dərc edilib.
"Ölkə.Az" xəbər verir ki, "Times" qəzetinin dünya xəbərləri səhifəsinin baş məqaləsi olan bu xəbərdə yarımbaşlıq olaraq "Ərdoğan Türkiyədə limitsiz və tək güc sahibi ola bilmək üçün baş naziri vəzifəsindən uzaqlaşdırmaq üçün tələ qurub" ifadəsinə yer verilib. Xəbərin müəllifi qəzetin Türkiyə üzrə müxbiri Hannah Lucinda Smitdir.
Prezident Ərdoğan ilə baş nazir Davudoğlu arasında dünən baş tutan görüşdən sonra iqtidar partiyası AKP-də fövqəladə qurultaya getmə qərarı alındığı bildirilmişdi. Baş nazir Davudoğlunun isə bu konqresdə namizəd olmayacağı gözlənilir.
"BBC Türkcə"nin ötürdüyü və "Times" qəzetinin dərc etdiyi xəbərdə Türkiyədə son vaxtlar baş verən dramatik hadisələrin səbəbi Türkiyə siyasətinin gələcəyi uğrunda gedən mübarizədən və bir-birinə zidd iki xarakterdən irəli gəldiyi göstərilir.
Qəzet Ərdoğanı xarakterizə edərkən yazır ki, prezident Ərdoğan fəhlə sinifindən və məhəllə anlayışından gəlmə, fitri istedadlı bir siyasətçidir. Türkiyənin konstitusiyasını dəyişdirmək, ölkənin parlamentli demokratiya əvəzinə tək adamlıq, yəni prezidentlik sistemi ilə idarə edilməsini istəyir. Baş nazir Davudoğlu isə tam əksinə, Ərdoğan tərəfindən bu vəzifəyə gətirilmiş "çoxbilmiş" bir akademikdir. Jurnalistlərin mühakimə edilməsinin tərəfdarı deyil. Ən əhəmiyyətlisi də Ərdoğanın prioriteti olan və konstitusiyada dəyişdirilməsini istədiyi maddələrlə razılaşmamasıdır.
"Times" qəzetinə danışan Vaşinqton mərkəzli Strateji və Beynəlxalq Araşdırmalar Mərkəzinin Türkiyə layihəsi üzrə direktoru Bülent Əli Rza baş verən proseslərə belə şərh verib:
"AKP-nin nizamnaməsinə görə partiyanın lideri Davudoğludur. Ancaq hər hansı bir adama əsl liderin kim olduğunu soruşsanız sizə Ərdoğan cavabını deyəcək. Bu da iki lider arasında münasibətlərin əsas qırılma nöqtəsidir".
"ƏRDOĞAN VAXTINDAN ƏVVƏL SEÇKİ KEÇİRİLMƏSİ ÜÇÜN ŞƏRAİT YARADIR"
"Times" qəzetinə danışan və adının çəkilməsini istəməyən AKP mənbələri prezident Ərdoğanın yay aylarında seçkilərin keçirilməsi üçün "çabaladığını" bildirib. Ərdoğanın bunda israrcı olmasının əsas səbəbi isə parlamentdə AKP-dən ən az 367 deputatın seçilib konstitusiyanın referenduma getmədən dəyişdirilməsidir.
ARALARI NECƏ DƏYDİ?
Bir neçə gün öncə baş tutan AKP Mərkəzi Qərar və İdarə Heyətinin (MKYK) iclasında, heyət hər böyük konqresdən sonra təşkilatlardan məsul sədr müavininə təhvil verdiyi regional və rayon rəhbərlərinin təyinatı səlahiyyətini Davudoğlunun əlindən almışdı.
Bu hadisədən sonra bazar günü internetdə "Pelikan Dosyesi" adı ilə açılan bir bloqda prezident Ərdoğanla baş nazir Davudoğlu arasındakı münasibətlərə dair bəzi iddialar yer alıb. Bloq yazısında AKP-nin sədri və baş nazir Əhməd Davudoğlunun bu vəzifələrə gətirilməsindən bu tərəfə prezident Ərdoğanın olduğu irəli sürülən səhvlərinə toxunulmuşdu. Ölkə.Az xəbər verir ki, baş nazir Davudoğlu çərşənbə günü AKP-nin parlamentdəki iclasında etdiyi çıxışında "Nəfsimi ayaqlar altına alaram, bir faninin tərk etməyəcəyi düşünülən hər vəzifəni əlimin tərsi ilə geri çevirərəm və heç vaxt bu ali hərəkatda yol yoldaşımın qəlbini qırmaram" ifadəsindən istifadə etmişdi.
Davudoğlu ilə görüşü öncəsi dünən icra nümayəndələri (muxtar) ilə görüş keçirən prezident Ərdoğan "Əhəmiyyətli olan olduğunuz yerə necə gəldiyinizi, orada nə etməniz lazım olduğunu və hədəflərinizi unutmamanızdır" deyə qapalı ismarış göndərmişdi.
DAVUDOĞLU BƏYANAT VERƏCƏK
Baş nazir Əhməd Davudoğlunun isə bu gün AKP-nin Mərkəzi İcra Kabinetini (MYK) toplayacağı bildirilir. Davudoğlunun daha sonra mətbuat konfransı keçirəcəyi və bəyanatla çıxış edəcəyi gözlənilir.
Qeyd edək ki, AKP nizamnaməsinin 70-ci maddəsinə görə partiyada konqres ya Sədr, ya MKYK, ya da nümayəndələrin ən azı 20 faiziinin yazılı tələbi ilə keçirilə bilər. Bu halda AKP-də növbədənkənar konqresin bir həftə ərzində elan edilməsi və konqresin də müraciət tarixindən etibarən ən geci 45 gün ərzində baş tutması vacibdir.
