Gəmiçilik işçilərinin maaşı 15% artırılıb
Azərbaycan Xəzər Dəniz Gəmiçiliyinin xarici sularda fəaliyyəti son bir ildə xeyli genişlənib, avqust-sentyabr aylarında 3 quru yük gəmisi Qara dəniz - Aralıq dənizi hövzəsində istismara cəlb edilib.
Yaxın zamanlarda isə AXDG tərəfindən alınmış daha 6 gəminin Xəzərdən kənarda istismara verilməsi planlaşdırılır. Bununla da Xəzərdənkənar hövzələrdə işləyən gəmilərimizin sayı 11-ə çatacaqdır.
Ölkə.Az xəbər verir ki, bu barədə 2015-ci ilin yekunlarına və qarşıda duran vəzifələrə həsr olunmuş “Azərbaycan Xəzər Dəniz Gəmiçiliyi” nin iclasında QSC-nin sədri Rauf Vəliyev bildirilib.
R.Vəliyevin sözlərinə görə, 2015-ci ildə əsaslı təmir olunan gəmilərin sayı əvvəlki illə müqayisədə 122% artıb:
“Donanmanın yeniləndirilməsi istiqamətində görülən işlərin davamı olaraq, Bakı Gəmiqayırma Zavoduna sifariş edilmiş 3 ədəd 80 nəfərlik sərnişin gəmisinin inşası tamamlanaraq, 2016-cı ilin aprelində Azərbaycan prezidentinin iştirakı ilə istismara verilib.
Bundan başqa, 2015-ci ildə Rusiyanın Həştərxan şəhərində AXDG-nin nümayəndəliyi açılıb. Bu nümayəndəlik gəmilərimizin Volqa-Don kanalından keçməsi və daşımalarla bağlı digər məsələlərin həllində mühüm rol oynayır.
Həmçinin gəmilərin təmiri, bu sahədə infrastrukturun genişləndirilməsi sahəsində xeyli iş görülüb. 2015-ci ildə əsaslı təmir olunan gəmilərin sayı əvvəlki illə müqayisədə 122% artıb.
“Zığ” gəmi təmiri zavodunda 130 metrlik yanalma körpüsünün inşaat işləri sona çatdırılıb, sahəsi 580 kv.m olan yeni yeməkxana və işçilər üçün 200 nəfərlik yüngül konustruksiyalı xidməti bina tikilib istifadəyə verilib”.
QSC-nin sədri onu da əlavə edib ki, ötən il işçilərin orta aylıq əmək haqqı15% artıb:
“Gəmiçilik işçilərinin rifahı və sosial problemləri daim diqqət mərkəzində saxlanılır.
2015-ci ildə AXDG üzrə orta aylıq əmək haqqı 2014-cü ilə nisbətən 15% artaraq 749 manat, üzücü heyət üzrə isə 835 manat təşkil edib.
Ərzaq təchizatı sistemi yenidən qurulmuş, tədarük olunan malların çeşidləri 5 dəfə artıb, üzücü heyət üzrə gündəlik ərzaq norması 1 nəfər üçün 5 manatdan 7 manata qaldırılıb, xidmətin və ərzaqların keyfiyyəti barədə rəy və təkliflərin, eləcə də hər hansı şikayətin vaxtında araşdırılması məqsədilə qaynar xətt yaradılıb”.
