Həftənin icmalı
May ayının qeyri-iş günləri açıqlandı — RƏSMİ
02.05.2016
May ayında 9 may Qələbə Günü və 28 may Respublika Günü ilə əlaqədar qeyri-iş günlərinin sayı məlum olub.
Ölkə.Az-ın məlumatına görə, Nazirlər Kabinetinin qərarına əsasən 2016-cı ildə 9 may bazar ertəsinə, 28 may şənbə gününə təsadüf edir.
28 may şənbə gününə təsadüf etdiyi üçün iş və istirahət günlərinin yerləri dəyişdiriləcək, 30 may qeyri-iş günü olacaq.
Beləliklə, may ayında 9 may Qələbə Günü və 28 may Respublika Günü ilə əlaqədar 2 gün qeyri-iş günü olacaq.
DİN polis məntəqəsində baş verən partlayışla bağlı məlumat yaydı
02.05.2016
Zaqatalada polis məntəqəsində partlayış baş verib.
Daxili İşlər Nazirliyindən Ölkə.Az-a verilən məlumata görə, mayın 1-də saat 07.30 radələrində Zaqatala RPŞ İctimai Təhlükəsizlik Bölməsinin sahə rəisi, polis kapitanı Rövşən Balıyev Əliabad qəsəbəsi ərazisində yerləşən polis məntəqəsinin qapısını açarkən partlayış baş verib.
Nəticədə məntəqənin qapı və pəncərə şüşələri dağılmış, xəsarət almış R.Balıyev DİN-in A.Heydərov adına Respublika Hospitalına yerləşdirilib.
Partlayışın qumbara partlamasından baş verməsi ehtimal olunur.
Xalq ordusu üçün 73 milyon manatdan çox vəsait topladı
02.05.2016
Mayın 1-dək Azərbaycan Silahlı Qüvvələrinə Yardım Fonduna daxil olan vəsaitin məbləği açıqlanıb.
Müdafiə Nazirliyinin mətbuat xidmətindən Ölkə.Az-a verilən məlumata görə, Azərbaycan Respublikası Prezidentinin 2002-ci il 17 avqust tarixli, 755 nömrəli fərmanı ilə təsdiq edilmiş Silahlı Qüvvələrə Yardım Fonduna bu il mayın 1-dək 73.095.369,76 AZN, 212.373,88 ABŞ dolları, 2993,69 avro və 5000 rubl vəsait daxil olub.
Aprel ayı müddətində Fonda 1 566 126 AZN, 582 ABŞ dolları, 300 avro, 5000 rubl vəsait köçürülüb.
Azərbaycanda dərmanlar bütün apteklərdə vahid qiymətə satılacaq
02.05.2016
İyunun sonunadək Azərbaycanda qeydiyyatda olan bütün dərmanlara vahid qiymət tətbiq ediləcək.
Ölkə.Az xəbər verir ki, səhiyyə nazirinin müavini Elsevər Ağayev APA-ya deyib ki, indiyədək çeşidindən, formasından, dozasından asılı olaraq, 7700 adda dərman preparatı Tarif Şurasında qiymətləndirilib.
Onun sözlərinə görə, gələn ay Tarif Şurasının iki iclasında qeydiyyatda olan eyni dərmanların bütün apteklərdə vahid qiymətə satılmasına qərar veriləcək:
“Hazırda ölkədə 11 minə yaxın dərman preparatı rəsmi qeydiyyatdan keçib”.
Zaqatalada əməliyyat — Saxlanılanlar var
03.05.2016
Daxili İşlər Nazirliyi Zaqatalada xüsusi əməliyyat keçiriib.
Ölkə.Az APA-ya istinadən xəbər verir ki, keçirilən əməliyyat bir neçə gün əvvəl sahə müvəkkili, 1971-ci il təvəllüdlü Rövşən Sadəddin oğlu Baliyevin iş otağında baş verən partlayışla bağlıdır.
Artıq bir neçə nəfər saxlanılıb.
Saxlanılan şəxslər rayon sakinləri - Vaqif Padarov, İslam Ağalarov, Vüqar və Əbdürrəhman adlı şəxslərdir.
Polis onların yaşadıqları evdə axtarış aparıb, bir neçəsinin evindən silah-sursat götürülüb.
Saxlanılan şəxslərin vəhhabi təriqətinin üzvü olduğu ehtimal olunur.
370 erməni Qarabağdan qaçdı
03.05.2016
Ermənistanın işğalı altında olan Azərbaycanın Talış kəndində yaşayan 90 erməni ailəsi Ermənistana qaçıblar.
Ölkə.Az Report-a istinadən xəbər verir ki, bu haqda Talış kəndindəki erməni icmasının əlaqələndiricisi Slava Bayunst bildirib.
Əlaqələndiricinin sözlərinə görə, problemin həlli üçün onlar Ermənistan hökumətinə məktubla müraciət ediblər.
Türkiyədən Azərbaycana gətirilən lobyada xəstəlik tapıldı
03.05.2016
Kənd Təsərrüfatı Nazirliyi yanında Dövlət Fitosanitar Nəzarəti Xidməti tərəfindən Azərbaycana daxil olan kənd təsərrüfatı məhsulları üzərində təhlükəsizliyə və keyfiyyətə nəzarət gücləndirilib.
Nazirliyin mətbuat xidmətindən Ölkə.Az-a verilən məlumata görə, Türkiyədən Azərbaycana idxal olunan 750 kiloqram ərzaqlıq lobya məhsulundan götürülən nümunələr müvafiq laboratoriyalarda analiz edilib. Aparılan analiz nəticəsində məhsulda karantin tətbiq edilən xəstəliklərdən lobyanın bakteriozu və ya bakterial yanıq ləkəliyi (Xanthomonas campestris pv. Phaseoli Dye) aşkar edilib.
Hemofiliyalı xəstələrin sayı artır
03.05.2016
“Azərbaycanda 1 500-dən çox hemofiliyalı xəstə dispanser qeydiyyatındadır”.
Ölkə.Az xəbər verir ki, bunu Elmi-Praktiki Hemofiliya Mərkəzinin rəhbəri Elmira Qədimova deyib. Onun sözlərinə görə, hemofiliya müxtəlif qanaxmalarla müşahidə olunan ağır irsi qan xəstəliyidir:
“Xəstəliyin səbəbi qanın laxtalanma prosesində iştirak edən VIII, IX və ya fon villebrand faktorunun çatışmazlığıdır. Təkrar baş verən şiddətli qanaxmalar, oynaqlara və yumşaq toxumalara xəstənin hələ uşaq və gənc yaşlarında əlil və şikəst olmasına, bəzən də ölümünə səbəb olur. Lakin çoxillik təcrübə göstərir ki, vaxtında və lazımi səviyyədə antihemofil preparatlarla aparılan müalicə, xəstələri nəinki ölüm təhlükəsindən xilas edir, hətta onlarda şikəstliyin və əlilliyin qarşısını alır”.
Cəzalar şərtləşdirilir — Cərimə 4 dəfə arta bilər
03.05.2016
Azərbaycanda əmlakı qəsdən məhv etmə və zədələməyə görə cərimələr ən azı 4 dəfə artırıla bilər.
Ölkə.Az xəbər verir ki, Milli Məclisdən Trend-ə verilən məlumata görə, bununla bağlı Cinayət Məcəlləsinin 186.1-ci maddəsinə müvafiq dəyişiklik edilməsi təklif olunur.
Belə ki, zərərçəkmiş şəxsə xeyli miqdarda ziyan vurmaqla törədilməklə özgənin əmlakını qəsdən məhv edən və ya zədələyən şəxsin 1000 manatdan 2000 manata qədər cərimə və ya iki ilədək müddətə azadlıqdan məhrum etmə ilə cəzalandırılması təklif edilir.
Hazırda həmin maddə ilə təqsirləndirilən şəxs 100 manatdan 500 manatadək miqdarda cərimə və ya iki ilədək müddətə azadlıqdan məhrum etmə ilə cəzalandırılır.
Dəyişiklik Milli Məclisin mayın 6-da keçiriləcək plenar iclasına tövsiyə olunub.
Azərbaycanın xalq şairi vəfat etdi
04.05.2016
Azərbaycanın Xalq şairi, tanınmış publisist Söhrab Tahir vəfat edib.
Ölkə.Az xəbər verir ki, bu barədə Azərbaycan Yazıçılar Birliyinin mətbuat katibi Xəyal Rza məlumat verib.
Qeyd edək ki, şəkər xəstəliyindən əziyyət çəkən şairin bu yaxınlarda hər iki ayağı amputasiya olunmuşdu.
Söhrab Tahir 1926-ci il avqustun 6-da İranın Astara şəhərində sənətkar ailəsində anadan olub. "Səadət" və "Şahpur" məktəblərində 9-cu sinfədək təhsil alıb, ailə vəziyyətinin ağırlığı üzündən atası ilə "İran-İngilis neft şirkəti"ndə işləməyə məcbur olub..
Azərbaycan dolma ilə bağlı UNESCO-ya müraciət edəcək
04.05.2016
Azərbaycan Mədəniyyət və Turizm Nazirliyi bütün türk dünyasına məxsus olan dolmanın bişirilmə ənənələrinin UNESCO-nun siyahısına daxil edilməsi üçün fayllar hazırlayır.
Ölkə.Az Trend-ə istinadən xəbər verir ki, bunu mədəniyyət və turizm naziri Əbülfəs Qarayev Milli Kulinariya Mərkəzinin yaranmasının 25 illik yubileyi münasibəti ilə keçirilən tədbirdə çıxış edərkən deyib.
Onun sözlərinə görə, Azərbaycan mədəniyyətinin daşıyıcıları bədnam qonşularımız tərəfindən təzyiqlərə məruz qalması heç kimə sirr deyil: "Bədnam qonşularımız nəinki torpaqlarımıza, hətta mədəniyyətimizə də təcavüz edirlər. Azərbaycan mətbəxi də bu proseslərdən kənarda qalmayıb. Keçən il Ermənistan bütün Şərqdə isifadə olunan lavaşı mənimsəmək istədi.
Pakistan və banqladeşlilərin Azərbaycana axınının qarşısı alındı
04.05.2016
Son zamanlar qanunsuz miqrasiyaya qarşı çox ciddi tədbirlər görülür. Son iki ay ərzində 3 mütəşəkkil dəstə aşkar etmişik.
Ölkə.Az xəbər verir ki, bu sözləri Dövlət Miqrasiya Xidmətinin rəisi Firudin Nəbiyev “Caspian European Club”un təşkil etdiyi biznes forum çərçivəsində jurnalistlərə deyib.
“Həmin şəxslər Banqladeş və Pakistan vətəndaşlarını Azərbaycana viza ilə dəvət edir və buradan İrana, Avropa və digər ölkələrə göndərmək istəyirdilər. Bununla bağlı olaraq, təxminən 75 nəfərə qədər şəxs aşkar etmişik. Əsas təşkilatçılar da artıq müəyyən olunub”, - deyə F.Nəbiyev qeyd edib.
Ordu generalı: Türkiyə hər zaman Azərbaycanın yanında yer alacaq
04.05.2016
Daxili işlər naziri, general-polkovnik Ramil Usubov Türkiyənin Jandarm Qüvvələrinin Baş Komandanı, ordu generalı Qalip Mendinin başçılıq etdiyi nümayəndə heyətini qəbul edib.
Bu barədə Ölkə.Az-a Daxili İşlər Nazirliyinin mətbuat xidmətindən məlumat verilib.
R.Usubov müstəqilliyini əldə etdikdən sonra Azərbaycanın Türkiyə ilə əlaqələrinin hər zaman yüksələn xətlə inkişaf etdiyini, dövlət rəhbərlərinin siyasi iradəsi və qarşılıqlı səfərləri nəticəsində dost və qardaş ölkələrimiz arasındakı münasibətlərin keyfiyyətcə yeni mərhələyə qədəm qoyduğunu məmnunluqla xatırladıb.
Fuad Qəhrəmanlının həbs müddəti uzadıldı
04.05.2016
Nəsimi rayon məhkəməsi həbsdə olan AXCP sədrinin müavini Fuad Qəhrəmanlının barəsində seçilmiş həbs-qətimkan tədbirinin müddətini uzadıb.
Bu barədə F. Qəhrəmanlının vəkili Fəxrəddin Mehdiyev məlumat verib. Onun sözlərinə görə, məhkəmə F.Qəhrəmanlı barədə həbs qətimkan tədbirinin uzadılması barədə istintaq orqanın verdiyi vəsatətə baxıb və həbs müddətini 2 ay uzadılıb.
F.Qəhrəmanlı ötən il dekabrın 8-də Nardaran hadisələri ilə bağlı çağırışlar etməkdə təqsirləndirilərək həbs edilib. Məhkəmə onun barəsində 3 ay müddətinə həbs qətimkan tədbiri seçib. O, Cinayət Məcəlləsinin 281 (dövlət əleyhinə açıq çağırışlar) və 283-cü ( milli, irqi, sosial və ya dini nifrət və düşmənçiliyin salınması) maddələri ilə ittiham olunur.
"Rusiya istismar müddəti bitmiş hərbi texnikanı kreditə Ermənistana verir"
04.05.2016
Azərbaycan Müdafiə Nazirliyi Ermənistanın kredit razılaşması əsasında Rusiyadan silah alması barədə məlumatlara münasibət bildirib.
Ölkə.Az xəbər verir ki, nazirliyin mətbuat xidmətinin rəhbəri polkovnik Vaqif Dərgahlı APA-nın sorğusuna cavab olaraq bildirib ki, müharibə edən ölkə üçün 200 milyon ABŞ dolları cüzi məbləğdir, bu pulla ordunu silahla təmin etmək mümkün deyil:
“Nəzərə alsaq ki, hazırda Ermənistanda korrupsiya və rüşvətxorluq tüğyan edir və ölkələrinin rəhbərliyində təmsil olunan şəxslərin hamısı kriminal ünsürlərdir, bu pulların böyük hissəsinin elə həmin rejim tərəfindən mənimsəniləcəyi şübhəsizdir”.
Evlənmək istəyən 52 nəfərdə dəhşətli xəstəlik aşkarlandı
04.05.2016
"Aprel ayında nikaha daxil olmaq istəyən şəxslərin 400 nəfərində talassemiya daşıyıcılığı, 52 nəfərində sifilis, 1 nəfərdə isə QİÇS xəstəliyi aşkarlanıb".
Ölkə.Az bildirir ki, bu sözləri modern.az-a açıqlamasında B.Eyvazov adına Elmi-Tədqiqat Hematologiya və Transfuziologiya İnstitutunun direktoru Zöhrə Əlimirzəyeva deyib. O qeyd edib ki, ötən ay 12500 nəfər nikaha daxil olmaq üçün tibbi müayinədən keçib.
"Ümumilikdə nikaha daxil olanların tibbi müayinəsi başlanılan müddətdən bu vaxtadək 130 min nəfər müayinədən keçib. Onlardan 6 min 921 nəfərdə talassemiya daşıyıcılığı, 415 nəfərdə sifilis, 75 nəfərdə isə QİÇS aşkarlanıb. 54 cütlüyün isə hər ikisinin talassemiya daşıyıcısı olduğu üzə çıxıb".
ANAMA Bakıda 100-dən çox mərmi tapdı
04.05.2016
Bakıda 100-dən çox mərmi tapılıb.
Azərbaycan Respublikası Ərazilərinin Minalardan Təmizlənməsi üzrə Milli Agentlikdən (ANAMA) Ölkə.Az-a verilən məlumata görə, Bakı şəhəri, Nərimanov rayonu İslam Abuşov küçəsi 16R küçəsində Fövqəladə Hallar Nazirliyi Xüsusi Riskli Xilasetmə Xidmətinin pirotexnikləri ilə birlikdə keçirilən əməliyyat tətbirləri nəticəsində 102 ədəd (8 ədəd 100 mm-lik top mərmisi, 8 ədəd 62 mm-lik minaatan mərmi, 9 ədəd 122 mm-lik top mərmisi, 7 ədəd 76 mm-lik top mərmisi, 1 ədəd 120 mm-lik minaatan mərmi, 1 ədəd 30 mm-lik top mərmisi, 4 ədəd SPQ-9 raketi, 64 ədəd BM-6 tank mərmisi) müxtəlif çaplı mərmilər aşkar olunaraq götürülüb.
Mehriban Vəzir Milli Şuradan çıxarıldı
05.05.2016
Yazıçı-publisist Mehriban Vəzir Milli Şuradan xaric edilib.
Ölkə.Az xəbər verir ki, bu barədə Milli Şuranın Koordinasiya Mərkəzinin bu gün keçirilən iclasında qərar qəbul edilib.
M.Vəzirin Milli Şuranın Əsasnaməsinə və fəaliyyət prinsiplərinə zidd hərəkətlərə yol verdiyinə görə qurumdan xaric olunduğu bildirilib.
“Google” əleyhinə imzatoplama kampaniyası başladı
05.05.2016
Şirkət Azərbaycan ərazilərinin adlarını təhrif edir
“Beynəlxalq İnformasiya və Tədqiqatlar İnstitutu” İB dünyanın məşhur petisiya saytı olan change.org saytında “Google” axtarış sisteminin “Google Map” əlavəsində Azərbaycan ərazi vahidlərinin erməni adları ilə təqdim olunmasına etiraz etmək məqsədi ilə imza toplama kampaniyasına başlayıb.
Ölkə.Az xəbər verir ki, kampaniyanın azərbaycanlı təşəbbüskarları “Google” şirkətinin “Google Map” əlavəsində Azərbaycanın Ermənistanın silahlı təcavüzü nəticəsində işğal olunmuş ərazilərində yerləşən coğrafi adların erməni toponimləri ilə dəyişdirilməsi hallarının şahidi olduqlarını bildiriblər.(Ağdam şəhəri - Akna; Akn; Hakaku;Xocalı şəhəri – İvanyan,Aigestan;Qubadlı şəhəri - Sanasar; Laçın şəhəri - Berdzor; Cəbrayıl şəhəri – Jrakan və s) Aparılan araşdırmalar zamanı məlum olub ki, ermənilər tərəfindən məkrli şəkildə adları dəyişdirilən, hazırda Azərbaycanın işğal olunmamış bəzi əraziləri də “Google Map” xəritəsində axtarış zamanı məhz qondarma adla çıxır.( Partav-Bərdə, Zod aşırımı – Sotskiy Pereval, Qaradağlı - Varanda) Kampaniyanı keçirən “BİTİ” Google şirkətindən Ermənistan tərəfindən işğal olunan tarixi Azərbaycan ərazilərinin adlarının təhrifini aradan qaldırmasını xahiş edir.
Düşmən qərarını verdi: ermənilər müharibəni seçdilər
06.05.2016
Ermənistan hökuməti bu gün keçirdiyi iclasda Dağlıq Qarabağdakı separatçı rejimin "dövlət müstəqilliyi"nin tanınması barədə qanun layihəsini təsdiqləyərək qəbul edib
Ölkə.Az milli.az-a istinadən xəbər verir ki, bu qanun layihəsinin müəllifləri Ermənistanın sabiq baş naziri, Erməni Milli Hərəkatının parlament fraksiyasının üzvü Qrant Baqratyan və İrs Partiyasından olan deputat Zarui Postancyancdır.
Ermənistan hökumətinin toplantısında qanun layihəsini xarici işlər nazirinin müavini Şavarş Köçəryan təqdim edib.
Ermənistan Dağlıq Qarabağın “müstəqilliyini” tanısa SAVAŞ OLACAQ
"Bu qanun layihəsi bütün ermənilər üçün vacibdir və hesab edirəm ki, o, qəbul olunmalıdır", - Ş.Köçəryan deyib.
8 mayda Azərbaycan ordusu döyüşə başlayacaq xəbərinə — Rəsmi reaksiya
06.05.2016
Müdafiə Nazirliyinin Mətbuat Xidməti Ermənistan kriminal hərbi-siyasi rejiminin gündəmə gətirdiyi, guya, Azərbaycan Silahlı Qüvvələrinin 8-9 may ərəfəsində hücuma keçəcəyi barədə məlumatlara münasibət bildirib.
Ölkə.Az xəbər verir ki, nazirlik Ermənistan tərəfinin BMT-nin Təhlükəsizlik Şurasının qərarlarına və qoşunlarının işğal edilmiş Azərbaycan ərazilərindən dərhal və qeyd-şərtsiz çıxarılmasına dair qətnamələrə əməl etməyəcəyi təqdirdə bunun baş verməsinin labüd və qaçılmaz olduğunu qeyd edib:
"Ermənilər hər gün, hər an, hər saat Silahlı Qüvvələrimizin torpaqlarımızın azad edilməsi, ərazi bütövlüyümüzün tam təmin olunması istiqamətində addımlar atacağını gözləməlidirlər.
Məşhur bir kəlamda deyildiyi kimi “Ölümü gözləmək, ölümün özündən daha dəhşətlidir”. AzərbaycanSilahlı Qüvvələri torpaqlarımızı düşməndən azad etməyə qadirdir və tam hazırdır. Ermənilər ölmək, hər gün ölümü gözləyərək səksəkə, qorxu içində yaşamaq istəmirlərsə, Azərbaycan torpaqlarını tərk etməli, işğalçılığa son qoymalıdırlar”.
Təhlükə: Bakıda bu yerlərdən ət almayın!
06.05.2016
“Hazırda paytaxtda “8-ci km bazarı” və “Təzə Bazar”da ölü heyvanların və mənşəyi məlum olmayan ətlərin satışı həyata keçirilir”.
Ölkə.Az xəbər verir ki, bu barədə azVision.az-a Azad İstehlakçılar Birliyinin sədri Eyyub Hüseynov bildirib.
Onun sözlərinə görə, bölgələrdən Bakıya gətirilən mənşəyi məlum olmayan ətlərdən kiçik kolbasa sexlərində və dönəxanalarda istifadə olunur: “Dönərxanaların 85%-i ətləri standartlara cavab verməyən yerlərdən alır. İki il öncə Standartlaşdırma Meterologiya və Patent üzrə Dövlət Komitəsi dönərxanalarla bağlı standartlar hazırladı və həmin yerlərə dönərləri gətirən müəssisələr müəyyən olundu. Halbuki, hazırda 85% dönərxanalar əti həmin yerlərdən almırlar”.
Xarici ölkə səfirləri cəbhə bölgəsinə getdilər
06.05.2016
Xarici ölkələrin Azərbaycandakı diplomatik nümayəndələri cəbhə bölgəsində yerləşən rayonlarda səfərdədirlər.
Bu barədə Ölkə.Az-a Xarici İşlər Nazirliyinin mətbuat xidmətinin rəhbəri Hikmət Hacıyev məlumat verib.
XİN rəsmisi bildirib ki, hazırda onlar Tərtərin Qapanlı kəndindədirlər.
Hikmət Hacıyevin sözlərinə görə səfərin sas məqsəd hazırda xarici ölkələrin Azərbaycanda akkreditasiya olunmuş 80-dən çox nümayəndəsini cəbhəyanı ərazilərdəki vəziyyətlə tanış etməkdir.
Oğurluğun bütün növlərinə görə cəzalar sərtləşdirildi
06.05.2016
Azərbaycanda oğurluğa görə cəzalar ağırlaşdırılıb, eyni zamanda mütəşəkkil dəstə oğurluğunun minimum həbs müddəti uzadılıb.
Ölkə.Az xəbər verir ki, APA-nın məlumatına görə, bu, bu gün Milli Məclisin plenar iclasında qəbul edilən Cinayət Məcəlləsinə əlavə və dəyişikliklərdə əksini tapıb.
Maddənin 1-ci bəndinə edilən dəyişikliyə əsasən oğurluq, yəni özgənin əmlakını gizli olaraq talama 500 manatdan 1000 manata qədər cərimə və ya 180 saatdan 240 saatadək ictimai işlər və ya 2 ilədək müddətə islah işləri və ya 2 ilədək azadlıqdan məhrumetmə ilə cəzalandırılacaq.
Azərbaycan və Türkiyənin sürücülük vəsiqələri qarşılıqlı tanınacaq
06.05.2016
Milli Məclisin plenar iclasında “Azərbaycan Respublikası Hökuməti ilə Türkiyə Respublikası Hökuməti arasında sürücülük vəsiqələrinin qarşılıqlı tanınması və dəyişdirilməsi haqqında” sazişin təsdiq edilməsi barədə qanun layihəsi müzakirəyə çıxarılıb.
Ölkə.Az APA-ya istinadən xəbər verir ki, məsələ barədə Hüquq siyasəti və dövlət quruculuğu komitəsinin sədri Əli Hüseynli məlumat verib.
Daha sonra Milli Məclis “Azərbaycan Respublikası Hökuməti ilə Türkiyə Respublikası Hökuməti arasında sürücülük vəsiqələrinin qarşılıqlı tanınması və dəyişdirilməsi haqqında” 2016-cı il martın 15-də Ankara şəhərində imzalanmış sazişi təsdiqləyib.
Beləliklə, artıq Azərbaycan və Türkiyədə sürücülük vəsiqələri qarşılıqlı tanınacaq.
“Azadlıq” qəzetinin rəhbərinə xəbərdarlıq edilib
06.05.2016
KİV fəaliyyətini tənzimləyən qanunvericilik aktlarının tələbləri kobud surətdə pozulub.
“Azadlıq” qəzetinə xəbərdarlıq edilib.
Baş Prokurorluğun mətbuat xidmətindən Ölkə.Az-a verilən məlumata görə, aparılmış araşdırmalarla müəyyən edilib ki, “Azadlıq” qəzetinin 5 may 2016-cı il tarixli sayında dərc edilmiş “Qalmaqallı qətllə bağlı sensasion təfərrüatlar” sərlövhəli məqalədə həmin dövri mətbu nəşrin rəhbərliyi tərəfindən həqiqətə uyğun olmayan və ibtidai araşdırmanın maraqlarına zidd olan informasiyalar ictimailəşdirilməklə, kütləvi informasiya vasitələrinin fəaliyyətini tənzimləyən qanunvericilik aktlarının tələbləri kobud surətdə pozulub.
Kredit borclarını ödəməyənlərin cərimələri artırıldı
06.05.2016
Azərbaycanda kreditor borclarını ödəməkdən qəsdən yayınma ilə əlaqədar cərimələrin miqdarı artırılıb.
Ölkə.Az xəbər verir ki, APA-nın məlumatına görə, bu, Milli Məclisin plenar iclasında qəbul edilən Cinayət Məcəlləsinə dəyişikliklərdə əksini tapıb.
Qüvvədə olan qanuna əsasən məhkəmənin qanuni qüvvəyə minmiş müvafiq qərarına görə təşkilat rəhbərinin və ya vətəndaşın kreditor borclarını, yaxud qiymətli kağızları ödəməkdən qəsdən yayınması xeyli miqdarda ziyan vurduqda üç ilədək müddətə müəyyən vəzifə tutma və ya müəyyən fəaliyyətlə məşğul olma hüququndan məhrum edilməklə və ya edilməməklə cinayət nəticəsində vurulmuş ziyanın iki misli miqdarında cərimə və ya bir ilədək müddətə islah işləri və ya üç ilədək müddətə azadlıqdan məhrumetmə ilə cəzalandırılır.
