"Hobbimdir, arada gizlicə avtobusa, metroya minirəm"
Müğənni Elvin Abdullayev Alternativ TV-də (Region TV) yayımlanan "Şou məkan" verilişinə eksklüziv açıqlamalar verib.
Sevilən ifaçı bunları söyləyib: "Xoşbəxtəm ki, səsimlə seçilirəm. İstəməzdim ki, mənim səsimi başqalarının səsinə oxşatsınlar. Radioda səslənən mahnılara qulaq asıram, səslərin əksəriyyəti bir-birinə oxşayır, demək olar ki, eynidir. Müğənniləri səhv salıram".
Tanınmış müğənni şəxsi həyatı ilə bağlı sualları da cavablandırıb: "5-6 ildir ki, avtobusa minmirəm. Amma arada gizli şəkildə avtobusa da, metroya da minirəm. Bu, gizli hobbimdir. Azərbaycanda "Qarabağ", Türkiyədə "Qalatasaray", dünyada "Real Madrid" klublarına azarkeşlik edirəm. Özündənrazı insan deyiləm. Bilirəm ki, kənardan elə görünürəm, amma elə deyiləm. Buna görə narahat da oluram. Yekəxana deyiləm. Çox ciddi olduğumu da söyləyirlər. Şəxsi həyatımda tamam fərqli birisiyəm. Bəzən o qədər zarafat edirəm ki, yaxınlarım məndən bezirlər. İctimai yerlərdə çox ciddi oluram. Bu, məni rahat hiss etdirmir. Çünki tamam başqa adamam. Geyimlərimi həyat yoldaşımla birlikdə seçirik".
Gənc müğənni sənəti ilə bağlı maraqlı açıqlamalar verib: "Bəzən çox çətinliklərlə qarşılaşdıqda, bu sənəti seçməyimə peşman olmuşam. Öz-özümə demişəm ki, nəyə görə seçmişəm axı. Arxamda sponsorum da yoxdur. Düşünəndə ki, mənim bu sənətdən başqa bir sənətim yoxdur, anlamışam ki, daha dözümlü olmalıyam. İndi peşman deyiləm. Sənətə görə nəyisə qurban vermək normal deyil. Hər şey yolundadırsa, niyə nəyisə qurban verəsən ki? Hələ ki, heç nəyi qurban verməmişəm, yaxşıdır hər şey. Mənə aparıcılıq təklifləri olub. Ciddi və məsuliyyətli bir iş olduğuna görə öz öhdəmə götürə bilməmişəm. Uğurumu öz sənətimdə tapmışamsa, bu yolda davam etməyim daha yaxşıdır".
