![İş yerindən oğurluq edib aptek borcunu \](https://olke.az/photo/770x415/2016/05/09/128733.jpg "İş yerindən oğurluq edib aptek borcunu \")
İş yerindən oğurluq edib aptek borcunu \"bağladı\"
Ölkə.Az El TV-yə (Region TV) istinadən xəbər verir ki, Ucar polisi rayon ərazisində oğurluq edən dəstəni zərərsizləşdirib. Ucar rayonu ərazisində yerləşən müəssisələrin birindən mühərrik və digər avadanlıqların oğurlanması barədə rayon polis şöbəsinə müraciət daxil olub. Bundan sonra polisin keçirdiyi əməliyyat-axtarış tədbirləri nəticəsində şübhəli şəxslər saxlanılıblar.
Məlum olub ki, saxlanılan şəxslər həmin müəssisədə çalışanlardır. İstintaq zamanı dəstə üzvləri oğurladıqları mühərrik və avadanlıqları metal tullantılarının qəbulu sexinə cəmi 30 manata satdıqlarını etiraf ediblər. Onlar bildiriblər ki, əldə olunan 30 manatı dostlarından birinin aptekə olan borcunu ödəməyə sərf ediblər. Faktla bağlı cinayət işi başlanılıb, istintaq aparılır.
"Həmin cinayəti törətmiş şəxslər, Ucar şəhər sakinləri Nurlan Namiq oğlu Məmmədov, Nicat Qüdrət oğlu Cəfərov, Cəmal Cəbrayıl oğlu Cəbrayılovdur. Həmin şəxslər yaxalanaraq istintaq qrupuna təqdim edilmişdilər. Onların oğurlamış olduqları 5 ədəd şirə vuran nasos maddi sübut kimi iş üzrə götürülmüşdür", - deyə baş müstəntiq Məsud Rəhimov bildirib.
