Naxçıvanda “Heydər Əliyev kuboku” keçirildi
Ümummilli lider Heydər Əliyevin anadan olmasının 93-cü ildönümə həsr edilmiş karate-do üzrə “Heydər Əliyev kuboku” uğrunda Naxçıvan Muxtar Respublikası açıq çempionatı keçirilib
Ölkə.Az xəbər verir ki, Naxçıvan Muxtar Respublikası Gənclər və İdman Nazirliyi ilə Karate-do Federasiyasının birgə təşkil təşkil etdiyi açıq çempionat Naxçıvan şəhərindəki İlham Əliyev adına Olimpiya-İdman Kompleksində baş tutub. Azərbaycan Respublikasının Dövlət Himni səsləndirildikdən sonra çıxış edən Azərbaycan Respublikasının gənclər və idman naziri Azad Rəhimov muxtar respublikada keçirilən yarışların mahiyyətindən danışıb.
2 gün davam edən karate-do üzrə “Heydər Əliyev kuboku” uğrunda Naxçıvan Muxtar Respublikası açıq çempionatında 200-dən çox idmançı və 15 komanda mübarizəyə qoşulublar. Reqlamentə əsasən, oğlanlar 6, qızlar isə 2 yaş qrupunda birincilik uğrunda mübarizə aparıblar. Oğlanların mübarizəsində Rəsul Yaqubov (6-7 yaş, Bakı), Məhəmməd Şıxəlili (8-9 yaş, Naxçıvan), Vüsal Seyidov (10-11 yaş, Naxçıvan), İmran Həsənov (12-13 yaş, Naxçıvan), Babək Qələmzadə (14-15 yaş, Bakı) və Mirpaşa Kərimzadə (16-17 yaş, Naxçıvan) bütün rəqiblərinə qalib gələrək açıq çempionatın qalibi olublar. Qızlar arasında isə Fatimə Vəliyeva (8-9 yaş, Bakı) və Səmra Sadiqova (10-11 yaş, Naxçıvan) həmyaşıdları arasında hamıdan güclü olublar. Sonra Naxçıvan Muxtar Respublikası açıq çempionatının qalibləri diplom və medalla mükafatalandırılıblar. Komanda hesabında qalib olan “Naxçıvan” komandasına isə kuboku Azərbaycan Respublikası gənclər və idman naziri Azad Rəhimov təqdim edib.
