3 kq narkotiklə tutuldu
Goranboy rayonunun Goranlı kənd sakini Balabəy Məmmədovun Lerikə ilk səfəri düşərli olmayıb.
Onun əlindəki torbalar rayon polisinin diqqətini cəlb edib. Üzərinə baxış keçirilərkən ondan nə az, nə çox - 3 kq 20 q çəkidə narkotik vasitə olan marixuana aşkar edilərək götürülüb.
“Araşdırma zamanı məlum olub ki, Balabəy Məmmədov həmin narkotik vasitəni Şəmkir rayonu ərazisində istintaqa məlum olmayan mənbədən əldə etmiş, satış məqsədilə Lerik şəhərinə gətirmişdir”, - deyə müstəntiq Zeynal Allahverdiyev bildirib.
Rayon polisi tərəfindən saxlanılaraq barəsində həbs qəti imkan tədbiri seçilən Balabəy Məmmədov narkotik vasitəni Lerikdə kimə verəcəyini gizlətsə də, hazırda istintaq bunu araşdırır. İndi Goranboy sakini tutduğu əməlindən peşman olduğunu deyir. Onu narkotiklərin qanunsuz dövriyyəsinə görə 5 ildən 12 ilədək həbs cəzası gözləyir.
