Baş rejissorun baş mühəndisin gözünü partlatmasına polisdən

Mingəçevir Dövlət Dram Teatrının baş rejissoru Xəzər Gəncəlinin baş mühəndis Habil Orucovu döyməsi haqda məlumat vermişdik.

Ölkə.Az məsələ ilə bağlı Daxili İşlər Nazirliyinin mətbuat xidmətinin rəis müavini Ehsan Zahidovla əlaqə saxlayıb. Zahidov əməkdaşımızla söhbətində bildirib ki, zərərçəkmiş şəxs polisə müraciət etməyibsə, polis məsələyə müdaxilə edə bilməz:

"Habil Orucov zəhmət çəkib polisə müraciət etsin. Ondan sonra məsələni araşdıraq".

Mingəçevir şəhər Polis idarəsinin təhqiqat bölməsinin rəisi Adil Abışov da saytımıza açıqlamasında Habil Orucov tərəfindən şikayət ərizəsinin daxil olmadığını bildirib.

Teatrdakı mənbə isə qeyd edir ki, H.Orucova polisə şikayət etməməsi barədə qeyri-rəsmi göstəriş verilib:

"İlk günlər Habil Orucovun oğlanları Xəzər Gəncəlini hədələdilər. Amma sonradan ona bildirildi ki, polisə şikayət etsə, işdən çıxarıla bilər. Halbuki həmin gün Habil müəllimin üstünə təcili yardım çağırılıb, ortada rəsmi sənədlər var".

Xatırladaq ki, bir neçə gün öncə teatrın baş rejissoru Xəzər Gəncəli baş mühəndis Habil Orucovu döyüb. Nəticədə Habil Orucov sifət nahiyəsindən ağır zədələr alıb, ürəyi gedib. Teatra təcili tibbi yardım çağırılıb.

Hadisədən qısa müddət sonra Xəzər Gəncəli Bakıya qaçıb. Bildirilir ki, baş mühəndisin oğlanları X.Gəncəliyə Mingəçevirə qayıdacağı halda onu döyəcəkləri ilə hədələyiblər. Habil Orucova isə bu barədə heç yerə şikayət etməmək tapşırılıb. Teatrın direktoru Səxavət Məmmədov, direktor müavini Vüsal Məmmədov və baş rejissor Xəzər Gəncəli Mədəniyyət və Turizm Nazirliyinə çağrılıblar.

Mövzunu diqqətdə saxlayacağıq.

İntiqam VALEHOĞLU
Ölkə.Az