Terrorçuların evlərini qohumları özləri yandırıblar
Çeçenistan rəhbəri Ramzan Kadırov bir neçə gün öncə Qroznu yaxınlığında polis postuna hücum edən terrorçu-kamikadzenin qohumunun evinin yandırılması məsələsinə aydınlıq gətirib.
Ölkə.Az xəbər verir ki, Çeçenistanın dağ kəndi olan Kenxidən polis postu yaxınlığında özünü partlatmış Şamil Canaraliyevin qohumu Ramazan Calaldinovun Rusiya prezidentinə məktub yazması medianın diqqətini bu məsələyə yönəldib.
Çeçenistan sakininin Putinə yazdığı məktubu dəyərləndirən Ramzan Kadırov bunun ağ yalan olduğunu bildirib.
"Bu insanlar özlərini gözə soxmaq, səs-küylə gündəmə gəlmək və özləri haqda əzabkeş təsəvvürü yaradaraq Avropada sığınacaq almaq istəyirlər. Çeçenistanda Calaldinovla heç kimin işi yoxdur. O, öz evini özü yandırıb və indi də səs-küy salaraq özünü gözə soxmaq istəyir", deyə Ramzan Kadırov vurğulayıb.
