"5 rayonun qeyd-şərtsiz bizə qaytarılması siçan tələsindəki pendirdir"

Vyanada Azərbaycan və Ermənistan prezidentlərinin görüşü keçiriləcək.

Görüşdə Rusiya, ABŞ və Fransa Xarici İşlər nazirlərinin də iştirakı gözlənilir. Görüşdən hansı nəticələrin əldə ediləcəyi böyük maraqla gözlənilir.

Prezidentlərin görüşü barədə millət vəkili Araz Əlizadə Ölkə.Az-a danışıb:

"İstərdim ki, Qarabağ problemi sülh yolu ilə həll olunsun. Ancaq sülh yolu ilə Qarabağ probleminin həll olunmasına inanmıram. Ona görə də, Vyana görüşündən yaxşı bir şey gözləmirəm.

Bizdə bir çoxları deyir ki, müharibəsiz 5 rayonu qaytarsınlar, sonra danışıqlar prosesi başlasın. 5 rayonun qeyd-şərtsiz bizə qaytarılması siçan tələsindəki pendirdir. Beynəlxalq qurumlar və maraqlı dövlətlər deyir ki, tərəflər güzəştə getsin. 5 rayon bizə müharibəsiz qaytarıldıqdan sonra Azərbaycana güzəştlər olacaq ki, ermənilər üstlərinə düşən güzəştləri etdilər, indi növbə Azərbaycanındır. Ona görə də, prezidentlərin görüşündən hansısa nəticə gözləmirəm.

Azərbaycan və Ermənistana təkliflər və təzyiqlər edəcəklər. Xüsusən də Azərbaycan tərəfinə. Erməni tərəfinin razılaşmaqdan başqa ayrı bir çıxış yolu yoxdur. Azərbaycan tərəfinə güclü təzyiqlər olacaq, ona görə də, prezident İlham Əliyevi çox gərgin iş gözləyir".

Səxavət Məmməd
Ölkə.Az