Deputat: “Ermənistana təzyiq edilməyənədək, indiki siyasətini davam etdirəcək”
“Dağlıq Qarabağ münaqişəsinin ədalətli həlli istiqamətində müsbət irəliləyiş yalnız Ermənistana təzyiqlərin edilməsi nəticəsində mümkündür”.
Bu fikirləri Ölkə.Az-a açıqlamasında Azərbaycan Demokratik İslahatlar Partiyasının (ADİP) sədri, Milli Məclisin deputatı Asim Mollazadə mayın 16-da Vyanada təşkil olunan prezidentlərin növbəti görüşünün nəticələrinə münasibət bildirərkən deyib.
Deputat bildirib ki,bu görüşdə ATƏT-in Minsk qrupunun həmsədr ölkələrinin xarici işlər nazirləri iştirak edib:
“Lakin mən müşahidələrimdən də görürəm ki, Ermənistan hələ də sülhə hazır deyil. Ermənistana qarşı təzyiq və ya sanksiyalar olmayana qədər, işğlaçı ölkə indiki status-kovonu davam etdirməyə çalışacaq. Ermənistana təzyiq edilməyənədək, indiki siyasətini davam etdirədək”.
A.Mollazadə qeyd edib ki, Azərbaycana təcili sülh lazımdır:
“Azərbaycan dövləti səbrlə Dağlıq Qarabağ münaqişəsinin sülh yolu ilə həllini istəyir və bu istiqamətdə bütün zəruri addımları atmağa hazırdır. Ancaq çox təəssüf ki, indi dünyada hüququn aliliyinə hörmət edilmir. Bu gün dünyada beynəlxalq hüquq normaları kobud şəkildə pozulur. Bizim regionda isə bu məsuliyyətini ATƏT-in Minsk qrupunun həmsədr dövlətləri və beynəlxalq təşkilatlar daşıyır. Azərbaycan işğalçı Ermənistanın təkcə cəbhə xəttində törətdiyi təxribatları deyil, eyni zamanda nüvə silahları ilə etdiyi hədə-qorxularını da dünya ictimaiyyətinin diqqətinə çatdırmalıdır”.
