Azadlıq prospektindəki dəhşətli yanğından 1 il ötür...

Azadlıq prospektində 15 nəfərin canını alan dəhşətli yanğından 1 il ötür.

Bir il öncə Bakı şəhəri Azadlıq prospektində penoplast üzlüyü yanan binanın qarşısına qərənfillərlə axın etmişdi. Bu gün də həmin o faciəli günü xatırlayan insanlar yanan binanın qarşısına qərənfillər düzürdülər.

Həmin yanğının ildönümü ilə əlaqədar Ölkə.Az-ın çəkiliş qrupu da yanan binanın qarşısında olub.

Hadisədən bir il keçdikdən sonra da insanlar binanın qarşısına gəlir, qərənfillər qoyur, həlak olanların ruhuna dualar oxuyurlar. Binanın həyətində olan xeyir və şər üçün nəzərdə tutulan mərasim zalında isə bina sakinləri tərəfindən həlak olanların xatirəsinə ehsan süfrəsi açılıb.

Bina yanarkən qohumlarını itirən Elşad Bağırov, hadisəni necə xatırlamasını Ölkə.Az-a danışıb:

"Evdə idik. Televizora baxırdıq. Veriliş yarımçıq kəsildi, binanın yanmağını göstərdilər, adları açıqlayanda gördüm ki, qohumlarımın adını da çəkirlər, Sahib Bağırov, Firəngiz Bağırova... Anam mənə baxdı, mən anama. Sahib bacısı Firəngizi xilas etmək istəyib, ancaq yanğın imkan verməyib... Adam danışa bilmir... (gözləri dolur)"