İlham Əliyev həmkarlarına başsağlığı məktubu ünvanladı

Azərbaycan Prezidenti İlham Əliyev Parisdən Qahirəyə uçan sərnişin təyyarəsinin qəzaya uğraması nəticəsində həlak olanlarla bağlı Fransa Respublikasının prezidenti Fransua Ollanda başsağlığı məktubu ünvanlayıb.

Ölkə.Az-ın xəbərinə görə məktubda deyilir: 

“Cənab Prezident, Parisdən Qahirəyə uçan sərnişin təyyarəsinin qəzaya uğraması nəticəsində həmvətənlərinizin həlak olması xəbərini kədər hissi ilə qarşıladım.

Bu faciə ilə əlaqədar Sizə, həlak olanların ailələrinə və yaxınlarına öz adımdan və Azərbaycan xalqı adından dərin hüznlə başsağlığı verirəm”.

Dövlət başçısı bu gün digər bir həmkarı  Misir Ərəb Respublikasının Prezidenti Əbdülfəttah əs-Sisiyə də başsağlığı məktubu ünvanlayıb. Məktubun mətnində deyilir:

“Cənab Prezident, “EgyptAir” şirkətinə məxsus təyyarənin qəzaya uğraması nəticəsində çoxsaylı insan tələfatı xəbəri məni olduqca kədərləndirdi.

Baş vermiş bu faciə ilə əlaqədar Sizə, həlak olanların ailələrinə və yaxınlarına öz adımdan və Azərbaycan xalqı adından dərin hüznlə başsağlığı verirəm.

Allah rəhmət eləsin!”