Müsavatdan qopmalar sürətləndi

Müsavat partiyası ən fəal üzvlərini itirir - daha bir gənc istefa verdi

Müsavat partiyasında istefalar davam etməkdədir. Hələ qurultay keçirilməzdən öncə verilən proqnozlar zamanla özünü doğruldur. Növbəti istefa fəal gənc Amid Süleymanovdan gəlib. 

Ölkə.az gəncin istefadan öncə yazdığı geniş statusu təqdim edir:

"Mən Süleymanov Amid Yusif oğlu 2005-ci ildən qeyri-rəsmi dəstəkçisi, 2011-ci ildən isə rəsmi üzvü olduğum Müsavat Partiyasından istefa verirəm. Partiya üzvü olduğum dövrdə Müsavatın güclənməsi yolunda bacardığım qədər fəaliyyət göstərmişəm. 2011-ci ildə Müsavat GT-nin İdarə Heyətinin 3 nəfəri həbs olunan ərəfədə partiya sıralarına qoşulmuş, onların və digər şərlənərək həbs edilən əqidə yoldaşlarımızın azadlığı üçün keçirilən onlarla icazəli və icazəsiz aksiyada iştirak etmişəm. Partiya sıralarında olduğum bu müddətə ərzində ölkəmizdə demokratik dəyişikliklərin olması üçün təşkil olunan bütün aksiyalarda fəal olmuşam. Müsavatda çox dəyərli insanlar qazandım, Elçin, Rauf kimi əqidə yoldaşları, dostlar qazandım. Müsavatdan getməyimə səbəb uzun illər bu yolda həyatını qoyan çox dəyərli şəxslərin övladları olan gənclərə belə partiya rəhbərliyini tənqid etdikləri üçün çəkinmədən iftiraların atılması, təhqir olunmaları (məlum gizli qrupda) və ən acınacaqlısı isə həmin şəxslərin partiyada hegemonluq etməsi, onlara "gözün üstə qaşın var" deyənin olmamasıdır. Vəziyyət o həddə çatıb ki, həmin şəxslər çox rahat şəkildə partiyanın hansısa seçkili orqanına namizədliklərini verirlər. Gizli qrupda və açıq şəkildə Qubad İbadoğlunu dəstəkləyən müsavatçıları təhqir edənlərə qarşı bugünə qədər tədbir görülməyən və bu etik sərhədlərin tapdalanmasına göz yuman rəhbərliyi olan bir partiyada qalmağın heç bir mənası yoxdur. Rəsulzadənin Müsavatını qəlbimizdə yaşatmaq qaldı sadəcə. Biz heç nə itirmədik, bizləri itirdilər. Yolumuza davam edirik!"

Qeyd edək ki, partiyadaxili baş verən istefaların sayında ciddi artımların olacağı gözlənilir.

Ölkə.az