Ümid Partiyası Güney Azərbaycanla bağlı bəyanat yaydı

Ümid Partiyası Güney Azərbaycanda 2006-cı il 22 may Oyanış Hərəkatının 10 illiyilə bağlı bəyanat yayıb.

Həmin bəyanatda deyilir:

“Tarixi Vətənimizin bir parçası olan Güney Azərbaycanda 2006- cı il mayın 22-də başlayan yeni hərəkat soydaşlarımızın şovinizmə qarşı mübarizə tarixində xüsusi bir mərhələnin əsasını qoydu. 2006-cı il 22 may-1 xordad günü “Xordad hərəkatı" adı ilə tarixə düşdü. Yaxşı xatırlayırıq ki, o zaman hakimiyyətin orqanı olan "İran" dərgisi soydaşlarımızı aşkar təhqir etməklə 80 ilə yaxındır sürən anti-türk, anti-Azərbaycan mahiyyətini bir daha ortaya qoydu. Üca millətimiz 80 illik istismar, assimilyasiya, aşağılama siyasətinə "Dur!" demək üçün Güney Azərbaycanın Təbriz, Urmiyə, Ərdəbil, Sulduq, Ooşaçay, Zəncan və başqa şəhərlərində ayağa qalxdı, şəhidlər verdi və haqq səsini ucaltdı. Bu Güney Azərbaycanın tarixində yeni bir mübarizə eposu yaratdı. Artıq o şərəf tarixindən 10 il ötür. Soydaşlarımız milli haqları uğrunda mübarizəyə davam edərək haqq savaşında bir an belə dayanmırlar. Bu gün də Tehran rejiminin zindanlarında onlarla güneyli fəal məhz milli düşüncələrinə görə dustaqdırlar. Son günlər Qəzvində azərbaycanlı qadın, milli fəal Süheyla Kargərin həbsi rəsmi Tehranın soydaşlarımıza qarşı ayrı-seçkilik siyasətini bir daha ortaya qoydu. Bu günlər rejimin məhbəsində tanınmış milli fəal Abbas Lisaninin və ona dəstək olan daha 11 milli fəalın aclıq aksiyasına başlaması da bizi olduqca nigaran edir. Bu fəallar Azərbaycanın müasir tarixində böyük bir mübarizə səhifəsi açdılar və onların Güneyin azadlığı üçün sağlam olmalarını arzu edirik. Əziz qardaş və bacılarımız! Siz haqq uğrunda savaşırsınız və haqq savaşları hər zaman qalibiyyətlə sonuclanır. Vətənimizin Güneyində azad, demokratik, milli haqlara söykənən bir sistemin qurulması diləyi ilə sizləri Oyanış Hərəkatının ildönümü münasibətilə təbrik edirik. Tanri Güneyli, Quzeyli Azərbaycanımızı qorusun!”

Ümid Partiyasının Mətbuat Xidməti