Final öncəsi "Neftçi"yə qarşı

"Neftçi" futbol klubunun əcnəbi mütəxəssislə danışıqlar aparması barədə yazılanlar həqiqəti əks etdirmir

Ölkə.Az-ın məlumatına görə, bu barədə klubun mətbuat xidmətinin rəhbəri Mehman Rəsulov məlumat verib. O, bildirib ki, kubokun finalından öncə belə xəbərlərin yayılması komanda daxilindəki ab-havaya mənfi təsir edir:

"Hörmətli həmkarlar, son günlər bəzi KİV-də "Neftçi"nin hansısa əcnəbi mütəxəssislə danışıqlar aparması yaxud razılığa gəlməsi barəsində məlumatlar yer alır. Əziz dostlar, bir daha nəzərinizə çatdırıram ki, "Neftçi" klubu tərəfindən heç bir məşqçi ilə danışıqlar aparılmır və bu mövzuda yayılan heç bir xəbər həqiqəti əks etdirmir. Mövsümün ən vacib oyunu ərəfəsində bu kimi xəbərlərin yayılması komanda daxilindəki ab-havaya təsirsiz ötüşmür. Bu baxımdan xahiş edirəm ki, bu kimi xəbərləri tirajlamadan öncə dəqiqləşdirək".

Xatırladaq ki, "Neftçi" sabah ölkə kubokunun finalında "Qarabağ"la qarşılaşacaq.

İntiqam VALEHOĞLU
Ölkə.Az