Libermanın partiyası İsrail koalisiya hökumətinə daxil oldu

Liberman İsrailin müdafiə naziri təyin ediləcək.

Ölkə.Az Anadolu Agentliyinə istinadən məlumat verir ki, ultrasağçı siyasətçi Aviqdor Libermanın "Bizim Ev İsrail" (BEİ) partiyası və Binyamin Netenyahunun rəhbərlik etdiyi "Likud" partiyası arasında BEİ-nin hakim koalisiyaya daxil edilməsinə dair razılıq əldə edilib.

Baş nazir Benyamin Netenyahu, maliyyə naziri Moşe Kaxlon və Aviqador Libermanın iştirakı ilə keçirilən görüş başa çatdıqdan sonra mətbuata verilən açıqlamada bildirilib ki, yaxın zamanlarda tərəflər arasında rəsmi saziş imzalanacaq.

Libermanın İsrailin müdafiə naziri təyin edilməsi gözlənilir. Bazar ertəsi o, Knessetdə and içəcək.

Razılaşmaya əsasən, Maliyyə Nazirliyi aztəminatlı pensiyaçıların müavinətlərinin artırılmasına 1,4 mlrd. şekel (400 mln. dollara yaxın) vəsait ayıracaq.

Libermanın koalisiyaya daxil olmaq üçün hökumət qarşısında qoyduğu şərtlərdən biri keçmiş Sovet Respublikalarından İsrailə köçüb gələn yəhudilərin həyat şəraitinin yüksəldilməsi məqsədi ilə pensiya islahatlarının aparılmasıdır.

İlhamə
Ölkə.Az