Biz digər neft istehsalçılarını dəstəkləməyə borclu deyilik

Səudiyyə Ərəbistanının xarici işlər naziri Adel əl-Cübeyr bəyan edib ki, Ər-Riyad neft bazarında öz payını qoruyub saxlamaq niyyətindədir və neft qiymətlərini bazar özü müəyyənləşdirməlidir.

Bu barədə Ölkə.Az "BBC"yə istinadən məlumat verir.

"Bazarda neftin qiymətləri təklif və tələb prinsipləri əsasında müəyyən olunur. Səudiyyə Ərəbistanının məqsədi bazarda öz payını qoruyub saxlamaq və yüksək qiymətlər qoyan istehlakçıları dəstəkləməməkdən ibarətdir",- deyə nazir ölkə telekanallarından birinə müsahibəsində bildirib.

Son zamanlar dünya bazarlarında neftin qiymətinin azalması ilə bağlı böhran fonunda Səudiyyə Ərəbistanı hasilatı azaltmaq çağırışlarına qarşı çıxırdı. Bu ölkə bildirirdi ki, xammalın maya dəyərinin ucuz başa gəlməsi ona neft və neft məhsullarını daha aşağı qiymətlərlə bazara çıxarmağa imkan verir. Əl-Cübeyrin sözlərinə görə, Ər-Riyad neft problemini siyasiləşdirmir və neft mövzusuna tamamilə iqtisadi nöqteyi nəzərdən yanaşır.

Aprel ayının sonunda Səudiyyə Ərəbistanı hökuməti ölkənin neft gəlirlərindən asılılığını azaltmağa kömək edəcək iqtisadi islahatlar planını təsdiqləyib. Proqnozlara əsasən, 2020-ci ilə qədər Səudiyyə Ərəbistanın iqtisadiyyatı tamamilə neft asılılığından azad olacaq.

İlhamə
Ölkə.Az