Zəlimxanın ocağı, Aşıq Azərin xəstə yatağı, təzə sədrin qulağı
İntiqam VALEHOĞLU
Səhərdən düşünürəm, haradan başlayıb, harada bitirəcəyimi də bilmirəm. Amma hələ də o fikirlərin təsiri altındayam...
Hər dəfə Aşıq Azər Xanlaroğlunun xəstə yatağından fotolarını görəndə acizləşirəm, nəsə yazmaq istəyirəm, amma yaza bilmirəm...
Deyirlər, ölümün yaşı yoxdur. Belə bir deyim də var ki, həyatdan doymaq olmur. Amma Azərin cəmi 33 yaşı var. Nə qədər maraqlı ömür sürsə də, həyatdan doyması mümkün deyil. İki körpə balası, həyat yoldaşı, bir az pafoslu səslənsə də sevənləri, aşıqlıq kimi peşəsi və ən nəhayət Məhərrəm Qasımlı kimi etdiyini başa qaxan, heç bir yerə sığmayan fikirləri düşünüb-daşınmadan səsləndirə bilən sədri var. Aşıqlar Birliyinin sədrini nəzərdə tuturam. Məhərrəm Qasımlının o açıqlamasını kaş ki, Azər oxumazdı. Oxumayıbsa, yaxınlarından xahiş edirəm, bu xəbəri ondan gizlətsinlər. Birlik sədri "Şərq" qəzetinə açıqlama verib. Deyib ki, Aşıq Azərin xəstəliyindən xəbəri var. Amma Aşıqlar Birliyi nə edə bilər ki? Ardınca isə təlim-tərbiyəsinə uyğun şəkildə fikirlər səsləndirib:
"Saytlar, mətbuat Aşıqlar Birliyi barədə yazanda gülməli rəqəmdən danışırlar. Aşıqlar Birliyinin 1 milyon büdcəsi var. O büdcədən 60 min manat Aşıq Azərə verilsin. Jurnalistlər, saytlar Aşıqlar Birliyinin büdcəsində olan o pulu tapsınlar, soxsunlar gözlərinə. Bizim o qədər pulumuz hardandır? Qaldı Azərə yardıma, mən özüm şəxsi büdcəmdən ona yardım etmişəm...Mən Azərlə də danışmışam, demişəm ki, "sən birdəfəlik mətbuata bir məlumat ver ki, mən sənə kömək etmişəm”, mənim yaxamdan əl çəksinlər. De ki, bir də mətbuat məni narahat etməsin! Mənim artıq səbrim qalmayıb ki, jurnalistlərin suallarına cavab verim. O xəstədir, Allah canına dəyməsin, mən nə edə bilərəm?”
Məhərrəm müəllim, biz tapa bilmədik. Çox çalışdıq, alınmadı. Siz tapmısınızsa, soxun o pulu gözünüzə. Şəxsən mən pulun bir təyinatını bilirdim-xərcləmək. Bu sizin kəşfiniz olduğu üçün, əvvəlcə özünüz sınaqdan keçirin. Əgər uğurlu alınsa, saytlar da sınayar...
Axı kişi kişiyə etdiyi yaxşılığı üçüncü adamın yanında deməz. Lap tutaq ki, bir örnək kimi deyər. Amma bu formada yox, Məhərrəm Qasımlı. Ayıbdır! Bu sözlər heç yerə sığmır. Ağzınızın danışdığını qulaqlarınız eşidirmi? Saallah eşidir?
Jurnalist soruşub ki, Aşıq Azərin səhhəti ilə bağlı ölkə rəhbərliyinə müraciət etmək fikriniz varmı? Elə bu yerdə sədr müəllim əsl üzünü açıb, töküb ortaya. Deyib ki, mən kiməm Aşıq Azərin xəstəliyinə görə müraciət edim? Burada əla bir etiraf edib. Çünki onun həmin birliyə necə sədr seçildiyi bəlkə özünə də qaranlıqdır.
Hələ ardını oxuyun:
"Hər şeyin bir qaydası, qanunu var. Hər insana görə Prezidentə müraciət etmək olmaz. Bu, qanuna ziddir. Axı mən niyə Azərə görə Prezidentə müraciət edim ki? Azər istedadlı aşıqdır. Amma indiki halda o statusa sahib deyil ki, onun üçün Prezidentə müraciət edim. Azər Xanlaroğlu nə Alim Qasımov deyil, nə də Ədalət Nəsibov deyil ki, ona görə müraciət ünvanlayaq. Onun sənət titulları imkan vermir ki, Prezidentə məktub ünvanlayaq ki, Azərə kömək olsun. O, Ədalət Nəsibov olsaydı, Aşıqlar Birliyi müraciət ünvanlaya bilərdi, bu məsələni rəsmi qurumların qarşısında qaldıra bilərdi. İndi hansı qanunla bunu edə bilərəm ki? Onun səhhəti ilə millət vəkili Qənirə Paşayeva da maraqlanıb, lazımi yerlərə məlumat verib. Qənirə xanımın ona kömək etməyə gücü çatmırsa, mən nə edə bilərəm? Aşıqlar Birliyi statusu olan sənətkara görə Prezidentə müraciət edə bilər. Mənim buna haqqım yoxdur axı”.
Mən bilmirəm bu kişini öləndə harada dəfn edəcəklər. Amma çox istərdim ki, onu statusu və insanlığa verdiyi qiymətin imkan verdiyi yerdə basdırsınlar. Özüm ondan gec ölsəm həftədə bir dəfə gedəcəm qəbrinin üstünə. Hərçənd ki, onun statusu buna imkan vermir.
Allah Zəlimxan Yaquba rəhmət eləsin! Gör "ocağı" kimə qoyub getdi...
