Mingəçevir Dövlət Dram teatrında premyera

Mingəçevir Dövlət Dram Teatrında İsi Məlikzadənin “Gəl qohum olaq” pyesi əsasında hazırlanmış tamaşanın premyerası keçirilib

Ölkə.Az-ın məlumatına görə, səhnə əsərinin quruluşunu Mədəniyyət və Turizm Nazirliyinin sifarişi ilə dəvət olunmuş xalq artisti Valeh Kərimov verib. Tamaşanın quruluşçu rəssamı Yusif İmamverdiyev, musiqi tərtibatçısı Elnur Rəsulovdur. Tamaşada əsas rolları Mingəçevir Dövlət Dram Teatrının aktyorları Eyvaz Əliyev, Fəridə Məmmədova, Afət Əliyeva, Aydın Quluyev və xalq artisti Valeh Kərimov ifa ediblər. 

Tamaşadan öncə teatrın direktoru Səxavət Məmmədov kollektivi və tamaşanın quruluşçu rejissoru Valeh Kərimovu yeni premyera münasibəti ilə təbrik edib.

Az müddət ərzində gərgin iş rejimi ilə işləyərək müvəffəqiyyətli bir tamaşa hazırladıqlarına, yüksək səviyyəli aktyor oyununa və verilən tapşırıqları peşəkarcasına yerinə yetirdiklərinə görə tamaşanın yaradıcı və texniki heyyətinə öz təşəkkürünü bildirib.

Sonra xalq artisti Valeh Kərimov tamaşaçıları salamlayaraq Mingəçevir teatrında işlədiyi dövrdə teatr kollektivinin əzmkar işindən məmnunluğunu bildirib. Qeyd edib ki, Mingəçevir teatrı bu kimi yeni-yeni premyeralarla teatrdan küsüb gedən tamaşaçıları geri qaytarmağa nail olub.

Ölkə.Az